د ترکیې د ورځپاڼو سرټکي

د سټار ورځپاڼې ” اردوغان : د اذربایجان سره د سوداګریز حجم هدف ۱۵ میلیارده ډالره دی “د ترکیې او اذربایجان ترمنځه په عالي کچه د ستراتیژیکو همکاریو شورا اتمه غونډه د اذربایجان په پلازمینه باکو کې د ولسمشر اردوغان او کوربه هیواد ولسمشر الهام علیوف په ګډون جوړه شوه.

ولسمشر اردوغان د غونډې نه مخکې د خبریالانو پوښتنې ځواب کړې.

هغه وویل چې " اوس زمونږ هدف  موجود ۴ نیم میلیاردو ډالرو سوداګریز حجم ۱۵ میلیاردو ډالرو ته لوړول دي. پدې مسئله کې مې د خپل ورور عليوف سره تفاهم وکړ. پدې مسئله کې باید زمونږ اړوند وزیران د خپل وس او توانه پورې هڅه وکړي."

ولسمشر اردوغان وویل چې دا حجم باید په ۲۰۲۰ کال کې ۱۵ میلیاردو ډالروته لوړ کړو.

د صباح ورځپاڼې ” ادلب ته د ټانکونو او اوبوس توپونو د استولو لړۍ دوام لري “ د سرلیک لاندې  لیکلي دي، د ترکیې وسله وال ځواکونه  د سوریې پولو ته د ټانکونو او زغروالو موټرو  استولو لړۍ ته دوام ورکوي. د ترکیې د بیلا بیلو سیمو نه تیره ورځ د سوریې پولو ته  ۳۰ موټریز کتار واستول شو. پدې کتار کې  ټانکونه ، زغروالې موټرې او توپونو شتون درلود. ویل کیږي  دا ټانکونه او توپونه د سوریې د ادلب په سیمه کې  د ترکیې د څار په نقطو او پوځي مرکزونو کې ځای په ځای کیږي.

همداشان  سیمې ته  د وسلو او مهماتو د استولو لړۍ هم دوام لري.

د ینې شفق ورځپاڼې ” ترکیه  د ناټو د ډاینامیک مانتا ۲۰۲۰ پوځي تطبیقاتو کې د ټولو پام ځانته رااړولی وو “ د سرلیک لاندې لیکلي دي، ناټو سازمان  د تحت البحري کښتیو په مقابل کې د هوا ، د اوبو د پاسه او سمندر په تل کې همکاریو د ودې، جګړې ته د چمتووالي د روزنیز پروګرام په چوکاټ کې  د سیجیلیا  د ټاپو په ختیځو څنډو کې  د ډاینامیک مانتا ۲۰۲۰ پوځي تطبیقات پیل کړل. د ترکیې سمندري ځواکونو پدې تطبیقاتو کې د ناټو سازمان سره  تر ټولو زیاته مرسته کوونکو سمندري ځواکونو په کتار کې ځای ونیو او خپل طاقت او توان يي ټولو ته ښکاره کړ.

د صباح ورځپاڼې ” ترکیه د بوران نه د لیتیوم تولید پیلوي “ د سرلیک لاندې لیکلي دي، ترکیه په نړۍ کې د بوران مادې  د ۷۰ سلنې  زیرمو خاوند  دی. د ترکیې د انرژۍ او طبعي زیرمو وزیر فاتح دونمز وویل چې  د بوران په ماده کې  لیتیوم  شتون لري. د برښنايي موټرو تر ټولو مهمه  نقطه د هغه بطرۍ  دي. د همدې امله  لیتیوم  ځانګړی اهمیت لري. ترکیه به د بوران د مادې نه  لیتیوم  جلا کړي او د لیتیوم تولید به پیل کړي. هغه وویل چې  انشاالله د روان کال د پایته پورې به د بوران مادې نه د لیتیوم د جلا کولو او تولید په خاطر  یوه فابریکه جوړه او په فعالیت پيل وکړي.

د خبرترک ورځپاڼې ” ترکش ایرلاین ایران او چین ته د الوتنو په اړه څرګندونې وکړې“ د سرلیک لاندې لیکلي دي، ترکش ایرلاین  چین ته خپلې الوتنې  د فبروري تر ۲۹ مې نيټې وځنډولې. همداشان ترکش ایرلاین ایران پلازمینې  تهران نه پرته نورو ټولو نقطو ته  د مارچ تر لسمې نیتې  خپلې الوتنو د ځنډولو پریکړه وکړه .