د ترکیې د ورځپاڼو سرټکي

د خبرترک ورځپاڼې « د چاوش اوغلو لخوا یونان ته پيغام »  د سرلیک لاندې لیکلي دي، د ترکیې د بهرنیو چارو وزیر مولود چاوش اوغلو  د ختیځې مدیترانې د مسئلې په اړه پيغام  استولی دی. چاوش اوغلو په استولي پیغام کې ویلي دي چې « ترکیه په سیمه کې په ټولو مسئلو کې  د ګټې ګټې  د قاعدې  په چوکاټ کې  یونان  د یو شریک هیواد په توګه لیدل غواړي. راځۍ چې د خپلو خلکو د رفاح او هوساینې په خاطر په ګډه کار وکړو. د ټولو هغه برخو لپاره چې ددې سیمې په اړه لیوالتیا ښايي  زمونږ همدا پيغام دی. راځۍ چې همکاري وکړو تر څو  هر سړی ددې همکارۍ نه ګټه اوچته کړي.

د صباح ورځپاڼې « د ځايي موټر ماډل  وڅیړل شو »  د سرلیک لاندې لیکلي دي، د هیواد د صنایعو او تکنالوژۍ وزیر مصطفی وارانک د ترکیې د سوداګریزو خونو او اسهامو د ټولنې د رئیس رفعت هسارجک اوغلو او په ترکیه کې د موټرو د متشبصینو سره  لیدنه وکړه. پدې لیدنه کې  د ترکیې د ځايي او ملي موټر  ماډل  نمونه په ګډه توګه وڅیړل شوه.

د حریت ورځپاڼې « د امریکا د سوداګرۍ وزیر ترکیې ته راځي »  د سرلیک لاندې لیکلي دي، د ترکیې د سوداګرۍ وزیرې رخسار پیکجان  وویل چې د امریکا د سوداګرۍ وزیر ویلبور روس سره د ټيلیفون په کرښه ګټورې خبرې وکړې. هغې وویل چې  ددې ټیلیفوني خبرو په پایله کې  د امریکا د سوداګرۍ وزیر  د مل هیت سره  د سپټمبر په لومړۍ نیمايي کې  ترکیې ته راځي.

د سټار ورځپاڼې « ترکیه او فنلنډ به د  روسیې هوايي حریم  کنټرول کړي » د سرلیک لاندې لیکلي دي، د روسیې د دفاع وزارت اړوند  ورځپاڼې لیکلي  دي چې  ترکیې او فنلنډ پوځي  هیتانو د هوايي حریمونو د تړون په چوکاټ کې  پرون   د ترکیې  د سي ان ۲۳۵ ډوله الوتکې  کشفي الوتکې سره  د روسیې د هوايي حریم  کنټرول پیل کړ. دا کنټرول به  د اګست تر ۹ مې نيټې دوام وکړي.

د وطن ورځپاڼې « ترکیه د بدن د غړیو د پیوند په برخه کې په دویم کتار کې ځای لري»  د سرلیک لاندې لیکلي دي، اژانس پرس  او پي ار نیټ  په نړۍ کې د بدن د غړیو  د پيوند او بښنې  د بانک  د شمیرو له مخې لیکلي دي چې  ترکیه  د بدن د غړیو  د بخشش کولو د عامه پوهاوي په برخه کې د ۷۲ سلنې سره  په نړۍ کې په دویم کتار کې ځای لري.

د ویلو ده چې  هندوستان  د ۷۴ سلنې سره په لومړي کتار کې ځای لري. همداشان  اسپانیا هم  د ۷۲ سلنې سره  د ترکیې سره په عینې کتار کې ځای لري.