د ترکیې د ورځپاڼو سرټکي

د نوي شفق ورځپاڼې  « اروپا ته درې غوڅ پيغامونه »  د سرلیک لاندې لیکلي دي، د ترکیې ولسمشر رجب طیب اردوغان  د بلجیم په پلازمینه بروکسل کې  د اروپايی ټولنې د شورا  ریس دونالد توسک او د اروپا د کمیسیون د ریس جین کلود جنکر  سره  په لیدنه کې  اروپا ته  درې غوڅ پيغامونه ورکړل. ولسمشر اردوغان پدې لیدنه کې د ترکیې او اروپايي ټولنې د اړیکو  په اهمیت ټینګار وکړ. ولسمشر اردوغان د ترهګرۍ پر وړاندې په مبارزه کې  په اروپا نیوکه وکړه او وویل چې  ترکیه يي یواځې پریښې ده. ولسمشر اردوغان  د اروپا نه د ترهګرۍ پر وړاندې په مبارزه کې د مرستې غوښتنه وکړه.

ولسمشر اردوغان وویل چې د ترکیې او اروپايي ټولنې ترمنځه  د ۲۰۱۶ کال د مارچ په میاشت کې د کډوالو په اړه لاسلیک شوی تړون باید هر څه ژر نافذ شي. اروپايي ټولنه باید  ددې تړون  شرطونه  پر ځای کړي.

د وطن ورځپاڼې  « د ترکیې د احسانونو مدیون  یو »  د سرلیک لاندې لیکلي دي ، په ملګروملتونو کې د امریکا  متحده ایالتونو دایمي استازې نیکي هیلي ترکیې ته د سفر پر مهال  د هتای ولایت د التن اوزو په ولسوالۍ کې د سوري کډوالو د موقت  کمپ نه  لیدنه وکړه.

نیکي هیلي  د یاد شوي کمپ  د روغتیايي مرکز، ابتدایه ښوونځیو  او کډوالو لپاره د جوړو شوو ټولنیزو مرکزونو نه  لیدنه وکړه. هغه  د سوري کډوالو د د امکاناتو په اړه  معلومات واخیستل. هغې وروسته خبریالانو ته وویل چې پدې کمپ کې د کډوالو لپاره هر ډول  امکانات  برابر دي. د سوري کډوالو سره  د ترکیې  د مرستو  له امله  مونږ  ټول  ددې هیواد د احساسونو مدیون یو. د ترکیې د خلکو نه  ددې ښې میلمنه پالنې له امله مننه کوو.

د سټار ورځپاڼې  «  د ځايي موټر په برخه کې لومړنی ګام  اوچت شو »  د سرلیک لاندې لیکلي دي، د ترکیې ولسمشر رجب طیب اردوغان  د سوداګریزو خونو او اسهامو د ټولنې په ۷۳ یمې عمومي غونډه کې  د وینا پر مهال  د ځايي موټر په اړه  په سوداګرو غږ وکړ. د سوداګریزو خونو ریس د ځايي موټر د جوړولو په مسله کې  سمدلاسه تیاری  وښود  او پدې اړه  د لا زیاتو معلوماتو اخیستو  لارې د نقشې د جوړولو په خاطر  د علم صنایع او تکنالوژۍ د وزیر سره  غونډه وکړه. وزیر  پدې غونډه کې وویل چې  زمونږ  لومړنی  هدف  تر ۲۰۱۹ کال د ملي موټر  جوړول  او بازار ته عرضه کول دي.

د صباح ورځپاڼې  « ترکیه د پانګه والۍ په برخه کې د جاذبې مرکز  »  د سرلیک لاندې لیکلي دي، د ترکیې او امریکا متحده ایالتونو ترمنځه  د سوداګریزې شورا  غونډه  په پلازمینه  واشنګټن کې جوړه شوه.

ګډونوالو  ددې خبرې په ټینګار وویل چې  ترکیه د ځوان نفوس، اصلاحاتو او ګډ فکر  په برخه  کې  د فرصتونو هیواد دی. دا هیواد د پانګه والۍ په برخه کې  د جاذبې مرکز  دی.

پدې غونډه کې ددې خبرې په ټینګار وویل شول چې  ترکیه  د ځوان نفوس  او طاقت له امله  د اوږدو کلونو لپاره به د جاذبې د مرکز په توګه  خپل  موقف حفظ کړي.