ДССУ: "Ымыркайларды Шифа ооруканасынан эвакуациялоо боюнча сүйлөшүүлөр жүрүп жатат"
ABC Newsтин маалыматына караганда, ДССУнун доктору Ричард Бреннан күйүүчү майдын жоктугу жана коопсуздук абалынын эвакуациялоону кыйындатканын кабарлады.
Израилдин курчоосунда калган Шифа ооруканасындагы ымыркайлардын эвакуацияланышы үчүн Дүйнөлүк Саламаттыкты сактоо Уюмунун (ДССУ) Египет бийлиги менен биргелешип иш алып барып, Израилдин Коргоо күчтөрү менен сүйлөшүүлөрдүн уланып жатканы билдирилди.
ABC Newsтин маалыматына караганда, ДССУнун доктору Ричард Бреннан күйүүчү майдын жоктугу жана коопсуздук абалынын эвакуациялоону кыйындатканын кабарлады.
Бреннан ДССУнун Газанын түндүгүндөгү ооруканалар менен бир нече күндөн бери байланыша албаганын белгилеп, «Бул таптакыр үмүтсүз абал»,-деди.
Уюмдун Египет бийлиги менен бирге эвакуациялар үчүн «коопсуздук кепилдиги жана коопсуз өтүүгө» карата Бириккен Улуттар Уюму (БУУ) аркылуу Израилдин Коргоо Күчтөрү менен сүйлөшүүлөрдү жүргүзүп жатканын маалымдаган Бреннан, күйүүчү майдын жетишсиздигинин да эвакуациялар үчүн көйгөй жаратканын белгиледи.
Бреннан жаңы төрөлгөн ымыркайларды, эрте төрөлгөн ымыркайларды жана реанимация бейтаптарын эвакуациялоо үчүн Шифа ооруканасына бара турчу конвой түзүүгө аракет кылып жатышканын, бирок мунун көп пландоону талап кылганын айтып: «Палестинанын Кызыл Жарым Айынын көпчүлүк тез жардам унаалары азыр иштебейт, ошондуктан биз Египеттен тез жардам унаасын алып келип, Шифа ооруканасына алып барууну ойлоп жатабыз»,- деди.
Бреннан 24 сааттын ичинде кырдаал тууралуу кененирээк маалымат алууга үмүттөнөрүн билдирди.
Дүйнөлүк саламаттыкты сактоо уюмунун акыркы маалыматына караганда, Шифа ооруканасында 36сы жаңы төрөлгөн ымыркай жана 27си реанимация бейтаптары болгон 600гө жакын бейтап, 280 кызматкер жана 2500 жеринен ажыраган адам бар.
