Мароккодогу жер титирөөдө каза болгондордун саны өсүүдө...

Мароккодо эпицентри Марракештин Эль-Хуз аймагында болгон 7 баллдык жер титирөөдө каза болгондордун саны 2 миң 12ге жетти.

Ички иштер министрлигинен берилген жазуу түрүндөгү маалыматта жер титирөөдө каза болгондордун саны 2 миң 12ге, жаракат алгандардын саны 2 миң 59га көбөйүп, анын 1404үнүн абалы оор экени белгиленди.

Марокко падышасы Мухаммед VI кечээ көп сандаган адамдын өмүрүн алган жер титирөөдөн улам өлкөдө үч күндүк аза күтүү жарыялады.

Каза болгондордун Аль-Хуз аймагында, Тарудант, Шисава, Верзазат, Марракеш, Азила, Агадир, Касабланка жана Юсифийе аймактарында катталганы маалымдалды.

Марокконун куралдуу күчтөрү, жергиликтүү башкаруу органдары, коопсуздук күчтөрү жана жарандык коргонуу топторунун издөө-куткаруу иштерин улантканы, жер титирөө болгон аймактарга гуманитардык жардам жеткирүү үчүн бардык каражаттардын мобилизацияланганы белгиленди.

Амезмиз шаарында жүрүп жаткан издөө-куткаруу жана урандыларды чыгаруу иш-чараларына облустук шаарлардан келген ыктыярчылар жана жергиликтүү эл катышууда.

Жер титирөө башкы шаарлардагы бир нече тарыхый эстеликтерди жана эски имараттарды талкалап, эң чоң кыйроолор айыл жерлеринде болгон.

Аймактагы эски мечиттердин арасында орун алган Амезмиздеги Мечит ал-Атик мунарасынын үстү жагы толугу менен талкаланып жатканда дубалдарында терең жаракалар пайда болгон.

Негизинен эски имараттарды жабыркаткан жер титирөөдө көптөгөн шаарда тарыхый эстеликтер да жабыркады.

Бузулган эстеликтердин арасында 12-кылымда курулган Марракештин жанындагы Масжид аль-Азам да бар.

Масжид ал-Азам Бириккен Улуттар Уюмунун Билим берүү, илим жана маданият боюнча уюмунун (ЮНЕСКО) Дүйнөлүк мурастар тизмесине киргизилген.

Марокко медиасы мурунку күнү жергиликтүү убакыт боюнча саат 23.10да болгон жер титирөөнүн борбор шаар Рабат менен бирге Касабланка, Мекнес, Агадир жана Фес шаарларында да сезилгенин билдирди.