გერმანიამ, შვედეთმა და პოლონეთმა სამი რუსი დიპლომატი გააძევეს

გერმანიამ, შვედეთმა და პოლონეთმა მათ ქვეყანაში მომუშავე თითო რუსი დიპლომატი ”პერსონა ნონ გრატად” გამოაცხადა.

გერმანიის საგარეო საქმეთა სამინისტროს მიერ გაკეთებულ წერილობით განცხადებაში ნათქვამია, რომ ბერლინში მდებარე რუსეთის საელჩოს ერთი თანამშრომელი 1961 წლის 18 აპრილის დიპლომატიური ურთიერთობების შესახებ ვენის კონვენციის მე -9 მუხლის შესაბამისად "პერსონა ნონ გრატად" გამოცხადდა.

განცხადების მიხედვით, ამ ნაბიჯით გერმანიის მთავრობამ რეაგირება მოახდინა რუსეთის მიერ 5 თებერვალს მიღებულ გადაწყვეტილებაზე.

შვედეთმაც, სტოკჰოლმში რუსეთის საელჩოში მომუშავე ერთი რუსი დიპლომატი "პერსონა ნონ გრატად" გამოაცხადა.

შვედეთის საგარეო საქმეთა მინისტრმა, ენ ლინდმა, საზოგადოებრივ მაუწყებელ SVT- სთან გაკეთებულ განცხადებაში აღნიშნა, რომ მათ სტოკჰოლმის საელჩოში მომუშავე ერთი რუსი დიპლომატი ”პერსონა ნონ გრატად” გამოაცხადეს და რომ რუსეთმა მათ სხვა გზა არ დაუტოვა.

პოლონეთის საგარეო საქმეთა სამინისტროს მიერ გაკეთებულ განცხადებაში აღნიშნულია, რომ გადაწყდა პოზნანში მდებარე რუსეთის საკონსულოდან ერთი დიპლომატის გაძევება.

რუსეთის საგარეო საქმეთა სამინისტრომ 5 თებერვალს რუსი ოპოზიციონერის, ალექსეი ნავალნის, მხარდასაჭერად გამართულ დემონსტრაციებში მონაწილეობის მოტივით გერმანიის, პოლონეთისა და შვედეთის საელჩოების სამი დიპლომატი „პერსონა ნონ გრატად“ გამოაცხადა.