Türkiyə mətbuatı, 17 mart 2022

“Sabah”: Ərdoğan birgə mətbuat konfransında 24 mart tarixi zirvə toplantısını açıqladı

  Türkiyə prezidenti Rəcəb Tayyib Ərdoğan 16 martda paytaxt Ankarada Polşa prezidenti Anjey Duda ilə keçirilən birgə mətbuat konfransında martın 24-də Belçikanın paytaxtı Brüsseldə keçiriləcək NATO Liderlər Zirvəsinə qatılacağını və sammitdə Rusiya ilə Ukrayna məsələləri ilə bağlı danışıqlar aparacağını bildirib.

“Haber Türk”: Çavuşoğlu rusiyalı həmkarı Lavrovla görüşdü

  Türkiyənin xarici işlər naziri Mövlud Çavuşoğlu martın 16-da Moskvada rusiyalı həmkarı Sergey Lavrovla görüşüb. Mariupolda təxliyyə işlərinin davam etdiyini söyləyən Çavuşoğlu indiyədək 15 mindən çox Türkiyə vətəndaşının ölkədən çıxarıldığını bildirib.

“Vatan”: Akar Kanadanın müdafiə naziri ilə görüşdü

  Türkiyənin milli müdafiə naziri Hulusi Akar 16 martda Belçikanın paytaxtı Brüsseldəki NATO qərargahında Kanadanın müdafiə naziri Anita Anand ilə görüşüb. Söhbət zamanı ikitərəfli və regional müdafiə, təhlükəsizlik və müdafiə sənayesində əməkdaşlıq məsələləri ətrafında fikir mübadiləsi aparılıb.

“Yeni Şafak”: Nazir Dönmez “2030-cu ildə yollarımızda bir milyon elektrik və ya hibrid avtomobil görəcəyik” dedi

  Türkiyənin enerji və təbii sərvətlər naziri Fatih Dönmez 16 mart açıqlamasında bildirib: “2030-cu ildə Türkiyədə təxminən bir milyon elektrik və ya hibrid avtomobil yollarda olacaq. Bunun üçün indidən infrastruktur gücləndirilir.”

“Star”: Yerli peyvənd TÜRKOVAC-dan qürurverici uğur

  Yeni növ koronavirusa (Covid-19) qarşı yerli peyvəndi hazırlayan Kayseri Erciyes Universiteti Peyvənd Araşdırma, İnkişafı və Tətbiqi Mərkəzinin direktoru professor Aykut Özdarendeli TÜRKOVAC peyvəndinin “Covid-19”un “Omicron” variantına qarşı da ciddi qoruyucu olduğunu söyləyib.