İsrail qüvvələri İordan çayının qərb sahilində fələstinlilərə sərt müdaxilə edib

İsrail qüvvələri və İsrail işğalçılarının İordan çayının qərb sahilində həyata keçirdiyi hücumlarda 7 fələstinlinin yaralandığı bildirilib.
Fələstin Qızıl Aypara Cəmiyyətindən verilən yazılı açıqlamada Nablusun Burka qəsəbəsində basqın zamanı İsrail əsgərləri tərəfindən döyülən 43 yaşlı fələstinli qadının Rafidya xəstəxanasına aparıldığı qeyd edilib.

Açıqlamada qrupların Nablusun şimalındakı Deyr Şeref qovşağında yəhudi işğalçılarının hücumuna məruz qalan 31 yaşlı fələstinli gəncə müdaxilə etdiyi bildirilib.

Tülkerimin şimal-şərqindəki Attil qəsəbəsində baş verən hadisələr zamanı yaralanan bir şəxslə Şərqi Qüdsdəki nəzarət-buraxılış məntəqəsində İsrail əsgərlərinin hücumu nəticəsində yaralanan bir nəfərin də xəstəxanaya aparıldığı qeyd olunub.

Digər tərəfdən Fələstinin rəsmi WAFA xəbər agentliyinin yaydığı məlumata görə, yəhudi işğalçıların Selfit şəhərində törətdikləri hücumda 2 fələstinli yaralanıb.
Cenin şəhərinin qərbində yerləşən Şile əz-Zəhr qəsəbəsində İsrail əsgərlərinin açdığı atəş nəticəsində əlindən yaralanan bir fələstinli xəstəxanaya aparılıb.
İsrail qüvvələrinin şəhərin cənubundakı hərbi keçid məntəqəsində 17 nəfəri saxladığı bildirilib.
Fələstinli Məhbuslar Dərnəyi və Fələstin Azadlıq Təşkilatına tabe olan  Fələstin Məhbus İşləri Komitəsi İsrail qüvvələrinin Tulkerim, Nablus, Ramallah, Betlehem, El Halil və Şərqi Qüdsdə etdiyi basqınlarda 35 nəfərin saxlanıldığı açıqlayıb.
Qeyd edək ki, İsrail qüvvələri oktyabrın 7-dən etibarən Qəzzaya intensiv zərbələr endirir, həmçinin işğal altındakı İordan çayının qərb sahili və Şərqi Qüdsdəki fələstinliləri saxlayır.
İşğal altındakı İordan çayının qərb sahili və Qüdsdə İsrail qüvvələri və qeyri-qanuni yəhudi işğalçıların hücumları nəticəsində 303 fələstinli həyatını itirib.