Liz Truss: "Rusiyanın hərbi gücünün azaldığına dair əlamət yoxdur"

İngiltərənin xarici işlər naziri Liz Truss Rusiyanın hərbi gücünün azaldığına dair əlamət olmadığını bildirib.

Nazir “Hazırda rusların Ukrayna yaxınlığındakı sərhəd bölgələrindən geri çəkilməsinə dair heç bir sübut yoxdur” deyib.

L. Truss "Telegraph" üçün yazdığı məqalədə Rusiyanın yalnız gücə hörmət etdiyini, buna görə də ABŞ daxil olmaqla NATO müttəfiqləri ilə Rusiyaya qarşı sərt cavab verməyə davam edəcəklərini vurğulayıb.

Diplomatiya üçün birgə səylərinin daha əvvəl görünməmiş ciddi sanksiyalar təhlükəsi ilə birlikdə kritik əhəmiyyət kəsb etdiyini vurğulayan Truss deyib:

"Rusiyanın bəzi qoşunların kazarmalarına qayıtması ilə bağlı iddiası ilə bizdə yanlış təhlükəsizlik hissi olmamalıdır. Rusiya ordusunun güclənməsi heç bir ləngimə əlaməti göstərmir. Hazırda rusların Ukrayna yaxınlığındakı sərhəd bölgələrindən geri çəkilməsinə dair heç bir sübut yoxdur. "

Truss Rusiyanın hər an işğala başlamaq üçün canlı qüvvə və texnikaya malik olduğunu bildiklərini deyib.

İngiltərənin xarici işlər naziri Truss deyib ki, Kremlinin uçurumdan geri çəkilmək və diplomatiya vasitəsilə başqa yol seçmək üçün hələ vaxtı var.

Bu arada, nazir Truss İngiltərənin Ukraynanın suverenliyinə dəstəyini bir daha təsdiqləmək və Moskvanı sərhəd boyu hərbi birləşmələrini dayandırmağa çağırmaq üçün bu gün Kiyevə səfər edəcək.

Truss səfər çərçivəsində həmkarı Ukraynanın xarici işlər naziri Dmitro Kuleba ilə görüşəcək.