Yevropa Ittifoqi mulozimi Turkiyaga tashrifini samarali deb baholadi

Yevropa Ittifoqining Qo'shnichilik va kengayishdan mas'ul Komissiya a'zosi Oliver Varhelyi Turkiyada siyosat, iqtisod, savdo, fan-texnika va ijtimoiy siyosat sohalarida ijobiy kun tartibiga hissa qo'shadigan samarali muloqotlar o'tkazganini ma'lum qildi.

Varhelyi ijtimoiy tarmoq orqali poytaxt Anqaraga ikki kunlik (6-7 sentyabr) tashrifi yakunlari haqida fikr bildirdi.

U mamlakat tashqi ishlar vaziri Hakan Fidan bilan uchrashganini ma’lum qilib, “Biz muloqot va hamkorlikni faollashtirish, umumiy farovonlik va barqarorligimizni qoʻllab-quvvatlash uchun maxsus kun tartibini ishlab chiqish, jumladan viza tartibini soddalashtirish, tijorat masalalari va sarmoyaviy imkoniyatlar bo‘yicha aloqalarni faollashtirish uchun ijobiy kun tartibini ishlab chiqishga kelishib oldik”,-dedi.

Savdo vaziri O'mer Bolat bilan bo’lgan uchrashuviga to’xtalgan Varhelyi, Bojxona ittifoqining yangilanishini hisobga olgan holda, savdoga salbiy ta'sir ko'rsatuvchi omillarga qarshi kurashishni kuchaytirishga qaror qilganligini ta'kidladi. U shuningdek, Yevropa Ittifoqining Rossiyaga qarshi sanksiyalari ijrosi xususida  birgalikdagi sa'y-harakatlar haqida samarali fikr almashganligini aytdi.

Yevropa Ittifoqi Komissari Varhelyi bundan tashqari, Turkiya Oila va Ijtimoiy Xizmatlar Vaziri Moxinur O'zdemir Goktash bilan bo’lgan uchrashuvga ham e’tibor qaratdi.

U uchrashuv chog’ida imzolangan xorijliklar uchun ijtimoiy integratsiya bo’yicha yordam loyihasini "Yevropa Ittifoqi tomonidan imzolangan eng katta kelishuv" deb atadi.

Varhelyi tashrif doirasida Energetika va tabiiy manbalar vaziri Alparslan Bayraktar, Vitse-prezident Jevdet Yilmaz, Sanoat va texnologiya vaziri Mehmet Fatih Kajir va Turk investorlar bilan ham uchrashuvlar o'tkazganini ma’lum qildi.

U Turkiyaning Yevropa Ittifoqidagi “Horizon Europe” va “Erasmus” dasturlaridagi ishtirokini muvaffaqiyatli deb baholadi.

Uning taʼkidlashicha, bu safar Turkiyaning “Raqamli Yevropa” dasturiga kiritilishi fan, texnologiya va taʼlim sohalaridagi hamkorlikka xizmat qiladi.