«‹TRT World› телевизийә қанили» еммий мукапатиға еришти

түркийә авази радийоси хәвири: «‹TRT World› телевизийә қанили» тәрипидин ишләнгән зәнҗирсиман мукапатлиқ һөҗҗәтлик филим «Off the Grid» ниң украинада сүрәткә елинған «украинадики урушниң күндилик хатириси» қисми, хәлқара телевизийә сәнәтлири вә пәнлири академийәси тәрипидин тарқитилидиған  хәлқара еммий мукапатиниң «хәвәрләр вә күндилик вәқәләр» категорийәсидә миңлиған һөҗҗәтлик филимләр арисидин таллинип еммий мукапатиға лайиқ көрүлди.

америка қошма иштатлириниң нйу йорк шәһиридә өткүзүлгән мурасимда, мукапатни һөҗҗәтлик филимни ишлигүчиләр моһсине әннаими вә александире павлиат тапшурувалди.

мукапат тарқитиш мурасимиға қатнашқан  түркийә радийо - телевизийә идарисиниң муавин баш мудири өмәр фаруқ танривәрди мундақ деди: ««әлвәттә, (бу  мукапатқа лайиқ көрүлгәнликимиз үчүн) өзимизни интайин пәхирлик һес қилимиз һәм буниңдин интайин хушалмиз. биз еришкән бу мукапат ‹TRT World› қанилиниң хәлқара хәвәрчилик вә тарқитиш ишлирида қолға кәлтүргән мувәппәқийәтлириниң испатидур. < Off The Grid> әтритини өз ичигә алған барлиқ меһнәткәш достлиримизни қизғин тәбрикләймән.»

«‹TRT World› телевизийә қанили» ниң директори бора байрақтар мундақ деди:

«бу мукапат алди билән ‹TRT World› қанилиниң, җүмлидин түркийә радийо - телевизийә идарисиниң қанчилик дәриҗидә зор мувәппәқийәтләрни қолға кәлтүрүватқанлиқини, хәлқара өлчәмдә тарқитиш бериватқанлиқини, хәлқара өлчәмдә хәвәрчилик қиливатқанлиқини испатлап бәрди. башқичә ейтқанда, бу америка қошма иштатлиридики телевизийәчилик саһәсисики әң чоң мукапат һесаблиниду. түркийәдә ишләнгән бир һөҗҗәтлик филим тунҗи қетим бу мукапатқа еришти. шуңа биз буниңдин интайин пәхирлинимиз.»

моһсине әннаими билән  александире павлиат ишлигән вә һақан хоҗаоғлу сүрәткә алған һөҗҗәтлик филимдә, украинада 2022 – йили феврал ейида партлиған урушниң вәһший йүзи һәйран қаларлиқ шәкилдә көргүчиләрниң диққитигә сунулиду. бу йәрдики пуқраларниң вә русийә армийәсиниң  турмушидики өзгиришләр әкс әттүрүлиду.