йаман иш қилғучиниң ақивити

түркийә авази радийоси: ниса сүриси, 81 – 87 - айәтләр. улар (йәни мунапиқлар): «әмриңгә итаәт қилдуқ» дәйду, сениң йениңдин чиқип кәткән чағда, уларниң бир түркүми өзлириниң ейтқан сөзлирини өзгәртиветиду (йәни әмриңгә хилаплиқ қилиду), аллаһ уларниң өзгәрткәнлирини хатириләп туриду (йәни пәриштиләрни уларниң әмәллирини йезишқа буйруйду). сән улардин йүз өрүгин (йәни кәчүргин), аллаһқа тәвәккүл қилғин (тәвәккүл қилғучиға) аллаһниң һамийлиқи йетәрликтур[81]. улар қуран үстидә пикир йүргүзмәмду? әгәр қуран (мушриклар билән мунапиқлар гуман қилғандәк) аллаһтин ғәйриниң тәрипидин болған болса, әлвәттә, униңдин нурғун зиддийәтләрни тапқан болатти[82]. (мөминләргә аит) аманлиқниң йаки қорқунчниң бирәр хәвири уларға (йәни мунапиқларға) йәтсә, уни тарқитиду, әгәр уни пәйғәмбәргә вә улар (йәни мөминләр) ниң ичидики иш үстидикиләргә мәлум қилса, (шу) хәвәрни чиқарғучилар уни (йәни шу хәвәрниң һәқиқий әһвалини) улардин әлвәттә биливалатти. (и мөминләр!) әгәр силәргә аллаһниң пәзли вә мәрһәмити болмиса иди, силәрниң азғина кишидин башқилириңлар, әлвәттә, шәйтанға әгишип кетәттиңлар[83]. (и муһәммәд!) аллаһниң йолида җиһад қилғин (йәни өзүң йалғуз болсаңму җиһад қилғин, саңа ғәлибә вәдә қилинған. мунапиқларниң җиһадтин қелип қалғанлиқиға әһмийәт берип кәтмә.) сән пәқәт өзүңгила җавабкар сән, мөминләрни (җиһадқа) қизиқтурғин, аллаһниң капирлар күчини тосидиғанлиқиму һәқиқәттур. аллаһниң күчи әң зордур, аллаһниң җазаси әң қаттиқтур[84]. кимки (кишиләр арисида) йахши (иш үчүн) шапаәт қилса, униңдин (йәни йахши иштин) униң несивиси болиду؛ кимки бир йаман (иш үчүн) шапаәт қилса, униңдин (йәни йаман иштин) униң несивиси болиду. аллаһ һәммә ишқа қадирдур[85]. силәргә бир киши салам бәрсә, униңға техиму йахши салам билән җаваб қайтуруңлар (йәни бир киши әссаламуәләйкум дәп салам бәрсә, униңға әссаламу әләйкум вә рәһмәтуллаһи вәбәрәкатуһу дәңлар), йаки униң саламини әйнән қайтуруңлар (йәни вәәләйкум әссалам дәңлар). аллаһ һәқиқәтән һәммә нәрсидин (йәни бәндилириниң чоң ـ кичик ишлиридин һесаб алғучидур[86]. аллаһтин башқа һеч мәбуд (бәрһәқ) йоқтур. аллаһ шәксиз болидиған қийамәт күнидә силәрни (һесаб елиш үчүн мәһшәргаһқа) җәзмән йиғиду. аллаһтинму тоғра сөзлүк ким бар? (йәни сөзидә, вәдисидә аллаһтинму садиқ һечким йоқ) [87]