америка малийә министири җанет йеллен хитайда зийарәттә болмақта

түркийә авази радийоси хәвири: америка малийә министири җанет йеллен хитайдики зийаритиниң биринчи бекити гуаңҗуда америка сода уйушмиси вәкиллири билән көрүшкәндә сөз қилип: «америка билән хитай оттурисидики иқтисадий мунасивәт дунйадики әң муһим икки тәрәплик иқтисадий мунасивәт. дунйаниң һәрқайси җайлирида дөләтләр бизниң иқтисадимизнила әмәс, мунасивитимизниму йеқиндин көзәтмәктә. бу мунасивәтни мәсулийәтчанлиқ билән давамлаштуруш керәк» деди.

йелен хитайда тиҗарәт қиливатқан америка ширкәтлириниң үчтин бириниң хитайдики риқабәтчилиригә селиштурғанда адаләтсиз муамилигә учраватқанлиқини тәкитләп, чәт әл ширкәтлириниң базарға киришидики тосалғулар вә америка ширкәтлиригә қаритилған мәҗбурлаш характерлик һәрикәтләрниң бу дөләттики сода муһитиға зийан салғанлиқини ейтти.

америка ширкәтлириниң бейҗиң һөкүмитиниң базар усулидин күнсери йирақлишиватқан позитсийәлиридин әндишә қиливатқанлиқини билдүрүп: «еһтийаҗтин артуқ ишләпчиқириш кәң көләмлик төвән баһалиқ експортни кәлтүрүп чиқириду. бу америка ширкәтлири вә ишчилириниң иш орнидин айрилип қелишини кәлтүрүп чиқирипла қалмай, һиндистан, мексика қатарлиқ дөләтләрдики ширкәтләргиму пассип тәсир көрситиду» деди.

у ишләпчиқириш иқтидариниң ешип кетишиниң тәминләш зәнҗириниң һәддидин зийадә мәркәзлишишини кәлтүрүп чиқиридиғанлиқини, буниң дунйа иқтисадиниң бәрдашлиқ бериш күчигә пассип тәсир көрситидиғанлиқини сөзлиригә илавә қилди.