әрдоған истанбул пул - муамилә мәркизини хизмәткә кириштүрүш мурасимида сөз қилди

түркийә авази радийоси хәвири: җумһур рәис әрдоған истанбул пул - муамилә мәркизиниң ечилиш мурасимидики сөзидә,  6 - февралдики йәр тәврәш апитигә қаримай, мәбләғ селиш вә тәрәққийат һәрикитини тезләткәнликлирини тәкитләп: «биз хәлқимизни арзулириға йәткүзүшни давамлаштурмақтимиз. бүгүнму пул – муамилә саһәсидә түркийәни техиму йуқири пәллигә көтүридиған истанбул пул - муамилә мәркизиниң ечилғанлиқидин һайаҗанлиниватимиз» деди.

йәр шари пул - муамилә еғирлиқ мәркизиниң күнсери гәвдилик һаләттә ғәрбтин шәрққә қарап бурулуватқанлиқиға ишарәт қилған әрдоған, тарихта шәрқ билән ғәрб оттурисида җуғрапийәлик вә сода көврүки ролини ойнған истанбулниң пул - муамилә базирлири оттурисидиму көврүклүк рол ойниғанлиқини ейтти.

өзлириниң истанбулни дунйаниң алдинқи қатардики пул - муамилә мәркәзлириниң биригә айландурғанлиқлирини тәкитлигән әрдоған: «истанбул тарихта қандақ бу дөләтниң пул - муамилә мәркизи болған болса, һазирму қайтидин пул - муамилә мәркизи болуш вәзиписини үстигә алиду» деди.

у истанбул пул - муамилә мәркизиниң түркийәни йәр шари пул - муамилә мәркизигә айландурушни нишан қилған йирақни көрәр түр икәнликини әскәртти вә сөзини давамлаштуруп: «истанбул пул - муамилә мәркизимизниң омумий көлими 1 милйон 400 миң кивадрат метир болуп, у 21 ишхана бинаси, 100 миң кивадрат метирлиқ сода мәркизи, 2100 кишилик қурултай мәркизи, меһманхана вә 26500 аптомбил сиғидиған әқлий иқтидарлиқ шәһәр модели қатарлиқ һәр хил алаһидилики билән сода дунйасиниң барлиқ еһтийаҗини қандуриду» дегәнләрни қәйт қилди.