مارت ئېيىدا تۇرالغۇ سېتىش نىسبىتى رېكورت ياراتتى

تۈركىيە ئاۋازى رادىيوسى خەۋىرى: تۈركىيەنىڭ ھەرقايسى جايلىرىدىكى تۇرالغۇ ئۆيلەرنىڭ سېتىلىش مىقدارى مارت ئېيىدا 2021- يىلىنىڭ  ئوخشاش ئېيىغا سېلىشتۇرغاندا %20.6 ئېشىپ، 134 مىڭ 170 گە يېتىپ، تارىخىي رېكورت بۇزۇلدى.

تۈركىيە ئىستاتىستىكا ئىنستىتۇتى (TUIK) نىڭ سانلىق مەلۇماتلىرىغا ئاساسلانغاندا، 3- ئايدا 23 مىڭ 974 ئۆي – ماكان سېتىلغان ئىستانبۇل ئالدىنقى قاتاردىن ئورۇن ئېلىپ، ئومۇمىي سېتىلىش مىقدارىنىڭ %17.9 نى ئىگىلىگەن. ئۇنىڭدىن قالسا، 12 مىڭ 609 ئۆي – ماكان سېتىلغان ئەنقەرە ئىككىنچى، 8051 ئۆي – ماكان سېتىلغان ئىزمىر ئۈچىنچى بولغان.

يانۋار – مارت ئايلىرى ئارىلىقىدىكى سېتىلىش مىقدارى %21.7 ئېشىپ، 320 مىڭ 63 گە يەتكەن. ئۆي – ساھەسى ۋەكىللىرى بىردەك، تەمىنلەش تۆۋەن، مال باھاسىنىڭ ئۆسۈپ كەتكەن بولۇشىغا قارىماي، سېتىلىش مىقدارىنىڭ ئېشىشىنىڭ ئۆي - مۈلۈكنىڭ جەلپ قىلىش كۈچىگە ئىگە مەبلەغ سېلىش قورالى ئىكەنلىكىنى كۆرسىتىپ بەرگەنلىكىنى ئوتتۇرىغا قويدى.