милйардерларниң көпийип кетиши вә кирим адаләтсизлики

түркийә авази радийоси хәвири: әнглийәниң инсанпәрвәрлик йардәм оргини (оксфам) дунйадики милйардерларниң тез көпийип кетиши вә кирим адаләтсизликигә алақидар доклат елан қилди.

оксфам тәрипидин бу һәқтә елан қилинған «байлиқни әмәс, хизмәтни  мукапатлаң» намлиқ доклатта,  дунйа нопусиниң % 1 итигә тоғра келидиған  әң бай кишиниң бултурқи йәр шари характерлик байлиқниң % 82 сигә игә болғанлиқи, бирақ дунйа нопусиниң әң йоқсул % 50 тини тәшкил қилидиған 3.7 милйард кишиниң бу байлиқтин бәһримән болалмайватқанлиқи әскәртилди.

доклатта әскәртилишичә, 2010 – йилдин буйан милйардерларниң байлиқи хизмәт қилидиған  адәттики кишиләргә селиштурғанда техиму көпәйгән, җүмлидин 2016 – йили марттин 2017 – йили мартқичә һәр икки күндә бир милйардер оттуриға чиққан болуп, бу җәрйанда милйардерларниң сани 2043 кә йәткән. 10 милйардердин 9 ини әрләр тәшкил қилидиған болуп, айаллар әрләргә қариғанда техиму аз пул тапқан вә әң төвән киримлик ишларға селинған. дунйадики әң чоң мода маркиларниң баш директорлириниң пәқәт 4 күнлүк мааши баңладештики тоқумичилиқ ишчилириниң бир йиллиқ киримидин ешип кәткән.

давос йиғиниға иштирак қилидиған оксфамниң директори винни бйанйима бу һәқтә елан қилған байанатида, мундақ деди: «милйардерлар саниниң тез көпийип кетиши муқим иқтисадий тәрәққийатниң әмәс, мувәппәқийәтсиз иқтисадий түзүмниң нәтиҗисидур. бизниң кийим – кечәклиримизни тикидиған, телефонлиримизни йасайдиған вә йемәк – ичмәклиримизни тәййар һалға кәлтүридиған инсанлар муқим вә әрзан малларни қолға кәлтүрүлүш үчүн суйиистемал қилиниватиду һәмдә ширкәтләр вә милйардерларниң мәбләғлирини көпәйтиш йолида ишлитиливатиду.»

оксфам һөкүмәтләрни барғансери әвҗ елип кетиватқан кирим адаләтсизликигә қарши  күрәш үчүн шерикләр вә баш директорларниң киримлиригә чәклимә қойушқа, охшаш сәвийәдә ишқа селиш вә охшаш сәвийәдә мааш беришкә, баҗ оғрилиғучиларға зәрбә беришкә вә маарипқа техиму көп мәбләғ аҗритишқа чақирди.