опек нефит ишләпчиқиришни қисқартиш мәсилисини музакирә қилиду

түркийә авази радийоси хәвири: нефит експорт қилидиған дөләтләр тәшкилати – опек баш катипи муһәммәд баркиндо, истанбулда чақирилған 23 – нөвәтлик дунйа енергийә қурултийида сөз қилип болғандин кейин мәтбуат мәнсуплириниң соаллириға җаваб бәрди.

опек дөләтлириниң өткән ай алҗирийәдә чақирилған ғәйрий рәсмий йиғинида чиқирилған <нефит ишләпчиқиришни қисқартиш> қарариниң бир бурулуш нуқтиси болғанлиқини әскәрткән баркиндо, бу қарарниң чоқум иҗра қилиниши керәкликини тилға елип өтти.

истанбулда чақирилған 23 – нөвәтлик дунйа енергийә қурултийиниңму бу қарарлар тоғрисида һәм айрим һәм ортақ йиғин өткүзүш үчүн бир пурсәт икәнликини билдүргән баркиндо, бу йәрдә ечилидиған йиғинда һәм опек әзалири һәм опек сиртидики дөләтләрниң ортақ пикиргә келишини күтидиғанлиқини қәйт қилди. у, алҗирийәдики йиғинида нефит ишләпчиқириш үчүн бир йуқири өлчәм бекитип чиқилғанлиқини хатириләткән һалда, «бу бизниң музакирилиримизниң асасий темиси болиду. русийә пирезиденти виладимир путинму бу мусапидә наһайити иҗабий рол ойниди. сәуди әрәбистан енергийә министириму ишларниң өзгәргәнликини, өтмүштә туралмайдиғанлиқини ейтти. шуңа бизму бу қарарниң иҗра қилиниши үчүн иҗабий позитсийә билдүрүлүшини көрүшни үмид қилимиз. истанбулға кәлгән енергийә министирлири билән чаршәнбә күни (әтә) саәт 14:00 тә алҗирийәдики йиғинда чиқирилған <нефит ишләпчиқиришни қисқартиш қарари> тоғрисида кеңәш өткүзимиз. айрим учришишларму давамлашмақта. истанбулдики енергийә министирлири бу йиғинида болиду» деди.

муһәммәд баркиндо, йиғиндин кейин йәнә бир мухбирларни күтүвелиш йиғини өткүзүшиниң мумкинликини сөзлиригә илавә қилди.