фидан түркийә-венезуела мунасивәтлириниң илгириләватқанлиқини ейтти

түркийә авази радийоси хәвири: ташқи ишлар министири хақан фидан түркийә-венезуела һәмкарлиқ комитетиниң 4-қетимлиқ йиғинини ахирлаштуруп, венезуела ташқи ишлар министири йван хил (Yvan Gil) билән бирликтә мухбирларни күтүвелиш йиғини өткүзди.

у венезуеланиң нурғун дөләт органлири вә һәр қайси министирлиқлирдин тәшкилләнгән вәкилләр өмикиниң түркийәдә министирлиқлар вә идарә-органларниң рәһбәрлири билән көрүшкәнликини билдүрүп, вәкилләр өмики қурған алтә комитетта хизмәтлирини ахирлаштурғанлиқини әскәртти.

у енергийә, йеза игилики, чарвичилиқ, сайаһәт, маарип, тәнтәрбийә вә сәһийә қатарлиқ саһәләр бойичә икки дөләт оттурисида муһим болған һәр хил темиларниң системилиқ һалда музакирә қилинғанлиқини әскәртип: «комитетлар бир һәптә музакирә қилип, тоққуз келишим түзди. түркийә-венезуела мунасивәтлири һәр саһәдә илгириләватиду. болупму, түркийә болуш сүпитимиз билән латин америка вә кариб деңизи дөләтлиригә ечилишимизниң мәркизидә венезуела бар. йеқинқи йилларда икки дөләт оттурисида елип бериливатқан өзара зийарәтләр, келишимләр, өзара мунакирәләр, содиниң ешиши нәтиҗисидә, түркийә венезуелани өз ичигә алған латин америкасида тәсири күчлүк дөләткә айланди» деди.

у көрүшүшләрдә икки дөләт мунасивәтлиридин башқа, район вә хәлқаралиқ мәсилиләрдиму өзара пикир алмаштурулғанлиқини билдүрүп: «венезуела дучар болуватқан адаләтсиз ембарголарни асас қилған һалда нурғун мәсилиләрни музакирә қилдуқ. буларниң ичидә йәнә бир муһим мәсилә болған пәләстин вә ғәззәдә давамлишиватқан қәтлиамларниму музакирә қилдуқ. мәмнунлуқ билән шуни демәкчимәнки, ғәззә мәсилисидә венезуела билән охшаш ойлаймиз вә һәрикәт қилимиз, хәлқаралиқ мунбәрләрдә охшаш позитсийә билдүримиз. ғәззәдики қәтлиамларниң тохтитилиши, пәләстин дөлитиниң етирап қилиниши мәсилисидиму давамлиқ тиришчанлиқ көрситимиз» деди.