erdoghan antalyada bezi döletlerning yuqiri derijilik rehberliri bilen körüshti

türkiye awazi radiyosi xewiri: jumhur reis erdoghan antalya diplomatiye munbirige ishtirak qilish üchün türkiyege kelgen jibutiliq mensepdishi ismail ömer guelleh, bosniye - gértségowina sérbiye teripining reisi milorad dodik we éswatini padishahi üchinchi miswati xanim qatarliqlar bilen körüshti.

jumhur reis erdoghan yene antalyada yighingha ishtirak qiliwatqan wéngiriye bash ministiri wiktor orbannimu qobul qildi؛ söhbet jeryanida, türkiye-wéngriye munasiwetliri, israiliyening pelestin xelqige qaratqan hujumliri, ukraina-rusiye urushining nöwettiki weziyiti, türkiye-yawropa ittipaqi munasiwiti we shimaliy atlantik ehdi teshkilati — natoning kéngiyish musapisi qatarliq mesililer muzakire qilindi.

erdoghan türkiye bilen wéngiriye otturisidiki iqtisadtin mudapie sanaitigiche, énérgiyedin qatnashqiche bolghan nurghun sahelerdiki yaxshi munasiwetning téximu kücheygen halda dawamlishidighanliqini éytti.

jumhur reis erdoghan israiliyening xelqara qanun we kishilik hoquqni bir chetke qayrip qoyup sadir qiliwatqan irqiy qirghinchiliqining aldini élishning barliq döletlerning mesuliyiti ikenlikini, israiliye teripidin ochuq-ashkara yoqitiliwatqan bigunah pelestin xelqining ahu-zarlirigha sel qarashqa bolmaydighanliqini qeyt qildi.

u türkiyening barliq toqunush rayonlirida tinchliq berpa qilinishi terepdari ikenlikini we bu yönilishni boylap küchlük qedemlerning dawamliq tashlinidighanliqini eskertti.

u yene iraq kord rayonluq hökümiti reisi nechirwan barzaninmu qobul qildi.

jumhur reis erdoghan yighinning birinchi küni (tünügün) türkmenistan milliy rehbiri gurbanguli berdimuhemmedow we bulghariyelik mensepdishi rumén radéw bilen körüshkenidi.

jumhur reis erdoghanning rehberler bilen ötküzgen ayrim uchrishishlirida, döletler otturisidiki munasiwet we rayongha alaqidar mesililer muzakire qilinghan bolsimu, asasliq küntertip, ghezzediki tiragédiye boldi.