фидан хәвпсизлик кеңишини ислаһ қилиш керәкликини тәкитлиди
ташқи ишлар министири хақан фидан ғәззә қатарлиқ нурғун мәсилиләрни «һәл қилалмиған» б д т хәвпсизлик кеңишиниң, барлиқ б д т системилириниң «һөрмитигә дағ чүшүргәнлики» ни алаһидә тәкитлиди.
түркийә авази радийоси хәвири: ташқи ишлар министири хақан фидан биразилийәниң рийо де жанеро шәһиридә өткүзүлгән G20 дөләт гуруһи ташқи ишлар министирлири йиғининиң «йәр шари башқуруш ислаһати» темилиқ бөлүмидә сөз қилди.
у көп қутуплуқ йеңи дунйа тәртипидики җуғрапийәлик сийасий җиддийчиликни йеңиш үчүн күчлүк көп тәрәплик орган вә үнүмлүк йәршарини башқуруш механизмлириға еһтийаҗлиқ икәнликлирини билдүрди.
у еһтийаҗ һес қилинған өзгиришниң әмәлгә ешишиниң муһим икәнликини әскәртип, буниң үчүн алди билән хәвпсизлик кеңишини ислаһ қилишқа әһмийәт бериш керәкликини қәйт қилди.
у ғәззә қатарлиқ нурғун мәсилиләрни «һәл қилалмиған» хәвпсизлик кеңишиниң барлиқ б д т системилириниң «һөрмитигә дағ чүшүргәнлики» ни алаһидә тәкитләп, техиму демократик, техиму мәсулийәтчан вә хәлқара қанунға тайанған системиға еһтийаҗлиқ икәнликлирини билдүрди.
у хәлқара пул-муамилә системисиниңму һәқиқий сиғдурушчан, қаидә-пиринсипқа тайинидиған, техиму очуқ-ашкара вә сиҗил болуши керәкликини билдүрди.
у тәрәққий тапқан вә тәрәққий қиливатқан дөләтләр оттурисидики пәрқни түгитиш үчүн хәлқара пул-муамилә аппаратлири вә көп тәрәплик тәрәққийат банкилириниң чоқум тәрәққий қиливатқан, тәрәққий қилмиған дөләтләргә мас келидиған сийасәтләрни қоллиниши керәкликини тәкитлиди. ундақ болмиғанда, имканийәтлик сиҗил тәрәққийат нишаниға йәткили болмайдиғанлиқини әскәртти. шуңа, бу нуқтидин ейтқанда, G20 ниң муһим рол ойнийалайдиғанлиқини қәйт қилди.
