фидан: пәләстинни қоллаш намайишлирини чәкләп, қуран кәримгә һуҗум қилишқа йол қойуш қош өлчәмдур

түркийә авази радийоси хәвири: дөлитимиз (түркийә җумһурийити) ташқи ишлар министири хақан фидан йавропа иттипақиниң түркийәдики вәкиллири башлиқи, баш әлчи николас мейир-ландрут вә йавропа иттипақиға әза дөләтләрниң әнқәрәдә турушлуқ баш әлчилирини ташқи ишлар министирлиқи қармиқидики йавропа иттипақи башқармиси бинасида қобул қилди.

дипломатик мәнбәләрдин игиләнгән учурларға асасланғанда, фидан баш әлчиләрни күтүвелиш җәрйанида бәзи учурларни бәргән.

у ғәззәгә алақидар өзгиришләр тоғрисида тохтилип, пуқраларни зәрбә обйекти қилған һуҗумларниң қобул қилғили болмайдиғанлиқини, уларни дәрһал тохтитип, уруш тохтитиш елан қилиниши керәкликини тәкитлигән.

«биз тоқунушниң район сәвийәсигә йетип қелишиниң алдини елишимиз керәк. икки дөләтлик һәл қилиш чарисини нишан қилған тинчлиқ мусаписи қобул қилинған параметирлар даирисидә тездин башлиши керәк. бу арқа көрүнүштә, биз кепиллик механизмидин пайдилинишқа болидиғанлиқиға ишинимиз» дегән фидан, сөзини давамлаштуруп: «бир қисим йавропа дөләтлиридә пәләстинни қоллаш намайишлириға чәкләш тәдбирлири йолға қойулуп, муқәддәс китабимиз қуран кәримгә қилинған һуҗумларға пикир әркинлики нами астида рухсәт қилиниши қош өлчәмдур» дегәнләрни қәйт қилған.

министир фидан тәртипсиз көчмәнликкә тақабил туруш мәсилисидиму йавропа иттипақиниң 18- март келишиминиң тәлипини орундиши вә техиму көп йүкни ортақлишиши керәкликини тилға елип: «террорлуққа қарши турушта техиму күчлүк һәмкарлиқ орнитишимиз керәк. түркийә әтрапимиздики мәсилиләрниң һәл қилинишида интайин муһим рол ойнайду. йавропа иттипақиниң түркийәгә йирақни көрәрлик билән йеқинлишип, ушшақ- чүшшәк сийасий пиланларни бир чәткә қайрип қойушини үмид қилимиз» дегән.

йиғинда балқан, кавказ, оттура асийа вә украина уруши қатарлиқ нөвәттики мәсилиләрму музакирә қилинған.