әрдоған: биз анадолуға малазгирт урушидин хели бурунла қәдәм басқан идуқ
дөлитимиз (түркийә җумһурийити) җумһур рәиси рәҗәп таййип әрдоған түркләрниң анадолуға малазгирт урушидин хели бурунла қәдәм басқанлиқини ейтти.
түркийә авази радийоси хәвири: җумһур рәис рәҗәп таййип әрдоған мушта өткүзүлгән малазгирт зәпириниң 952 – йиллиқини тәбрикләш мурасимида қилған сөзидә мундақ деди: «анадолуни бизгә вәтинимиз қилип бәргән барлиқ қәһриманлиримиз, шеһитлиримиз, ғазилиримиз вә қәлб султанлиримизни чәксиз иптихарлиқ һәм миннәтдарлиқ туйғуси ичидә мәңгү йад етимән.»
«султан алпарслан вә униң қошунидики һәр бир әскәр бизгә аманәт қойуп кәткән бу земинни ахирқи бир тамчә қенимиз қалғучә қоғдаш ирадимизниң қәтийликини бу йәрдин йәнә бир қетим пүткүл җаһанға җакарлаймиз. малазгирт урушиниң адәттики бир уруш, адәттики бир зәпәр әмәсликидин ибарәт өлмәс һәқиқәтни һәргиз унтуп қалмаслиқимиз керәк.»
әрдоған сөзини мундқ давамлаштурди:
«биз анадолуға малазгирт уруши арқилиқ қәдәм басмидуқ. биз бу йәргә хели бурунла кәлгән идуқ. малазгирт уруши анадолудики сийасий игилик һоқуқимизниң дәрвазилирини бизгә ечип бәрди. бу йәрдә қолға кәлтүрүлгән мислисиз зәпәр алди билән анадолу сәлчуқийлар дөлитини қуруш арқилиқ әһли сәлип қошунлириға мислисиз қақшатқуч зәрбә бериштә муһим рол ойниди.»
«шуниңдин кейин охшаш етиқад билән байриқини ләпилдәткән османли империйәсиниң мувәппәқийәтлик күрәшлири нәтиҗисидә балқан райони вә истанбул пәтһи қилинди. башқичә ейтқанда, малазгирт изникниңму, конйаниңму, бурсаниңму, әдирнәниңму, истанбулниңму чоң акисидур. бизни австрийәниң пайтәхти вена дәрвазилириниң алдиға елип барғаб зәнҗирсиман зәпәрләрниң башлиниш нуқтисиму дәл мушу йәрдур.»
