әрдоған: түркийә русийәниң қиримни бесивелишини қобул қилғини йоқ

түркийә авази радийоси хәвири: җумһур рәис рәҗәп таййип әрдоған украинаниң пайтәхти кийевда өткүзүлгән 3 – нөвәтлик қирим мунбири башлиқлар йиғиниға йоллиған синлиқ байанатида, украинаниң байрақ күни вә мустәқиллиқ күнини тәбриклиди, һәмдә қирим давасини тинч йоллар билән техиму үнүмлүк қоллаш үчүн қурулған бу мунбәрниң қирим мәсилисидә бәрмәкчи болған сигналларға муһим төһпиләрни қошидиғанлиқини тәкитләп мундақ деди: «түркийә русийәниң қиримни бесивелишини тунҗи күндин башлапла қобул қилмастин, буниң қанунсиз икәнликини изчил түрдә илгири сүрүп кәлмәктә. биз йәнә украинаниң земин пүтүнлүки вә игилик һоқуқини қоғдаш мәйданимизни изчил сақлап келиватимиз. бирләшкән дөләтләр тәшкилатини өз ичигә алған һәрбир хәлқаралиқ сәһнидә қиримниң украинаниң мәңгү айрилмас бир парчиси икәнликини оттуриға қойуп келиватимиз. қиримниң йәрлик хәлқлиридин болған қирим татар түрк қериндашлиримизниң бихәтәрлики вә бәхт-саадитигә капаләтлик қилиш бизниң әң муһим вәзипилиримиздин биридур.»

әрдоған тутқундики қирим татарлири миллий мәҗлисиниң муавин рәиси нәриман җәлал вә униң достлириниң қойуп берилишини чин дилидин үмид қилидиғанлиқлирини әскәртип мундақ деди: «һәмишә тәкитләп келиватқинимдәк, урушниң ғәлибә  қилғучиси болмиғинидәк, тинчлиқниңму мәғлубийәтчиси болмайду. мана мушу аңни чөридигән һалда икки йилға йеқин вақиттин буйан үзлүксиз давамлишиватқан русийә – украина урушиниң адил вә узақ мәзгиллик тинчлиқ асасида ахирлишиши керәкликигә болған ишәнчимизни сақлап келиватимиз. бу җәрйанда барлиқ алақә васитилиридин пайдилинип еқиватқан қанниң тохтиши, һечболмиғанда тәрәпләрни сөһбәт өткүзүшкә қайил қилиш үчүн наһайити зор тиришчанлиқ көрситиватимиз.»

җумһур рәис әрдоған қарадеңиз ашлиқ каридори келишимини әслигә кәлтүрүш үчүн давамлиқ хизмәт ишләватқанлиқлирини, бу басқучта җиддийчиликни техиму әвҗ алдуруветидиған вә қарадеңиз райониниң тинчлиқиға зийан йәткүзидиған һәрқандақ һәрикәттин сақлиниш керәкликини байан қилди.