«‹TRT World› мунбири» йиғинида суний әқил мәсилиси муһакимә қилинди
түркийә радийо - телевизийә идариси — т р т (TRT) ниң хәлқаралиқ телевизийә қанили т р т ворлд (TRT World) тәрипидин уйуштурулған «кәлгүсигә нәзәр — ‹TRT World› мунбири» йиғинида суний әқилниң ахбарат васитилириға болған тәсири муһакимә қилинди.
түркийә авази радийоси хәвири: истанбулда өткүзүлгән йиғинда «йеңи чегра характерлик ачқучлуқ мәсилә — суний әқил ахбарат васитилириға қандақ тәсир көрситиватиду?» темилиқ илмий муһакимә йиғини өткүзүлди.
җаффар хаснайин рийасәтчилик қилған бу илмий муһакимә йиғиниға, гогул ширкитиниң асаслиқ қарарлирини чиқириш ишлири директори касси козирков, «алмост» медийа ширкитиниң қурғучиси вә баш директори чо, «Goodable» медийа ширкитиниң баш иҗраийә әмәлдари муһәммәд лила қатарлиқлар қатнашти.
гогул ширкитиниң асаслиқ қарарлирини чиқириш ишлири директори касси козирков иҗтимаий алақә вә йеңи пикирләрни оттуриға қойуш мәсилисидә суний әқилгә селиштурғанда инсанларниң техиму маһир икәнликини байан қилип мундақ деди: «суний әқил адәмни мәшғул қилидиған ишларни техиму йахши вә техиму тез иҗра қилалайду, шундақла бизниң муһим ишларға диққитимизни мәркәзләштүрүштә бизгә йардәм бериду.»
«алмост» медийа ширкитиниң қурғучиси вә баш директори чо сүний әқилни ишлитиштә очуқ – ашкара болушниң муһимлиқини тәкитлиди, һәмдә бу технологийәни ишлитиштә әхлақ пиринсиплириға риайә қилишниң зөрүрлүкини әскәртти.
«Goodable» медийа ширкитиниң баш иҗраийә әмәлдари муһәммәд лила инсанларниң өзлириниң дунйа қаришини әкис әттүридиған учурларға әһмийәт беришни йахши көридиғанлиқини, суний әқилниң инсанлар оттурисидики қутуплишиш (тәрәпбазлиқ) ни әвҗ алдуруветишидин қаттиқ әнсирәйдиғанлиқини байан қилди.
«йолни башқичә таллаш — сайаһәтниң өзгиришчан келәчики» темисидики илмий муһакимә йиғиниға, сайаһәтчи вә аммиви таратқу һәвәскари муһәммәд әлселини нутуқ сөзлигүчи сүпитидә қатнашти.
әлселини «гогул хәритиси» қатарлиқ һәр хил қоллинишчан пирограммиларниңму шәхсләрниң сайаһәт тәҗрибисиниң тәрәққий қилишида муһим рол ойниғанлиқини, бу пирограммиларниң суний әқил сайисида кишиләрниң қизиқиш әһвалиға қарап тәклип-пикирләрни беридиғанлиқини әскәртти, шундақла бу пирограммиларниң сайаһәтчиликни күндин-күнгә тәрәққий қилдуруватқанлиқини тәкитлиди.
«кәлгүсигә нәзәр — ‹TRT World› мунбири» ниң «килимат әндишиси — йашлар охшимиған пиланетни арзу қилиду» темисидики илмий муһакимә қисмидиму килимат ишлири паалийәтчилири вә мутәхәссислири «килимат кризиси» һәққидә муһакимә елип барди.
реган дес вигнес рийасәтчилик қилған бу илмий муһакимә йиғиниға, килимат ишлири паалийәтчиси, «Force of Nature» ниң қурғучиси вә баш дериктори кловер хоган, «Earth Uprising International» гуруһиниң медийа ишлири гурупписиниң директори рем әлсаффар, «BlackGirl Environmentalist» гуруһиниң қурғучиси вава гатеру вә муһит асриғучи сәйфунми адебот қатарлиқлар қатнашти.
«Force of Nature» ниң қурғучиси вә баш директори кловер хоган йәршариви мәсилә болған килимат өзгириши мәсилисидә һәрикәткә өтүлмәсликиниң «аҗизлиқ» қа сәвәб болғанлиқини байан қилди.
«BlackGirl Environmentalist» гуруһиниң қурғучиси вава гатеру екологийәлик муһитниң бузулушидин нурғун кишиләрниң җавабкар икәнликини оттуриға қойди.
«Earth Uprising International» гуруһиниң медийа ишлири гурупписиниң дириктори рем әлсаффар килимат өзгиришиниң тәсирини «килимат киризиси» дәп тәсвирләшниң хата икәнликини қәйт қилди, һәмдә бу мәсилини инсанларниң кәлтүрүп чиқарғанлиқини тәкитләп мундақ деди: «үмидимизни йоқитип қоймай килимат өзгиришиниң тәсиригә қарши һәл қилиш чариси тепишқа тиришишимиз керәк.»
