түркийә исраилийә армийәси вә көчмәнлириниң күнсери күчийиватқан зораванлиқини әйиблиди

түркийә авази радйоси хәвири: түркийә ташқи ишлар министирлиқиниң йазма байанатида, «исраилийә армийәси вә исраилийә көчмәнлириниң ғәрбий қирғақтики күнсери күчийиватқан таҗавузчилиқ вә зораванлиқ һәрикәтлирини әң күчлүк әйибләймиз» дейилди.

байанатта, исраилийә армийәсиниң җәнин панаһланғучилар лагериға қилған һуҗуми вә исраилийә көчмәнлириниң ғәрбий қирғаққа қарашлиқ хувара шәһиридики пәләстинлик аһалиләргә қилған зораванлиқи шундақла қорқутуш һәрикәтлирини қобул қилишқа болмайдиғанлиқи тәкитләнди.

байанатта: «күнсери күчийиватқан бу һуҗум вә һәрикәтләр райондики җиддийчиликни техиму улғайтип, зораванлиқ долқунини қозғиди вә муқәддәс рамизан ейи йеқинлашқан мәзгилдә җиддийчиликни пәсәйтиш үчүн хәлқараниң көрситиватқан тиришчанлиқиға зийан йәткүзди. биз бу һуҗумларни тохтитиш вә зораванлиқниң алдини елиш һәққидики чақириқимизни қайта тәкитләймиз. исраилийә һөкүмитини сағлам әқил вә мәсулийәтчанлиқ билән һәрикәт қилишқа чақиримиз» дейилди.

ишғалийәт астидики ғәрбий қирғақниң шималиға җайлашқан җәнин панаһланғучилар лагериға исраилийә әскәрлири қилған һуҗумда алтә пәләстинлик өлтүрүлгән вә 26 пәләстинлик йаридар қилинған иди.

исраилийә армийәси ишғалийәт астидики ғәрбий қирғақ вә шәрқий қуддуста даим дегүдәк өйләргә бесип керип, һәр хил әйибләшләр билән пәләстинликләрни тутқун қилиш һәрикитини давамлаштурмақта.

исраилийә армийәси вә йәһудий көчмәнләрниң оқ чиқириши нәтиҗисидә, йил бешидин буйан айаллар вә балиларни  қошқанда, җәмий 74 пәләстинлик өлтүрүлди.