erdoghan diyarbakirdiki apet rayonini tekshürdi

türkiye awazi radiyosi xewiri: jumhur reis erdoghan diyarbakirdiki chédir sheherde bayanat berdi؛ «biz (6 – féwral) yekshenbe küni bashtin kechürgen 7.7, arqidin yüz bergen 7.6 bal yer tewreshler, dölitimizning tarixidiki eng chong pajie bolghan 1999 – yilidiki yer tewreshtin üch hesse shiddetlik, üch hesse weyran qilghuch boldi» dégen erdoghan, sözini dawamlashturup: «dunyaning aldinqi qatardiki alimlirimu dölitimiz bashtin kechürgen yer tewreshning chongluqi we weyran qilghuchluqi mesiliside hempikir. bu esirning pajiesi, dep atiliwatqan bu yer tewresh, 1000 kilométir jayda hés qilinghan bolushigha qarimay, 500 kilométirliq jaygha weyranchiliq élip keldi» dédi.

sheherlerning bir qismidiki izdesh – qutquzush xizmetlirining axirlashqanliqini, bir qismidiki xizmetlerning téz sürette dawamlishiwatqanliqini tekitligen erdoghan: «inshaallah bu yerdiki xizmetlernimu téz sürette tügitimiz, xarabilik astida meyli ölük, meyli tirik birmu puqrayimizni qoymaymiz. arqidin tézlik bilen xarabiliklerni tazilap, yéngidin sélish paaliyitimizni bashlaymiz. yüz minglarche turalghuni yéngidin salimiz, toghrisini dégende, yer tewreshte éghir talapetke uchrighan sheherlirimizni yéngiwashtin qurup chiqishning pilanlirini tüzimiz» dégenlerni qeyt qildi.

döletning barliq imkaniyetlirini seperwer qilghanliqlirini bildürgen jumhur reis erdoghan: «biz xelqimizni qiyinchiliqta, yoqsulluqta, kochida tashlap qoymiduq we qoymaymiz» dégenlerni sözlirige ilawe qildi.