تۈركىيە - شىۋېتسىيە - فىنلاندىيە ئۈچ تەرەپ يىغىنى كېچىكتۈرۈلدى

تۈركىيە ئاۋازى رادىيوسى خەۋىرى: بۆلگۈنچى تېررورلۇق تەشكىلاتى — پ ك ك تەرەپدارلىرى شىۋېتسىيەدە جۇمھۇر رەئىس رەجەپ تاييىپ ئەردوغانغا قارشى قۇترىتىش خاراكتېرلىك پائالىيەتلەرنى ئېلىپ بارغان 21 – يانۋار(2023)، پايتەخت ستوكھولمدىكى تۈركىيە ئەلچىخانىسى ئالدىدا قۇرئان كەرىمنى كۆيدۈرۈش قىلمىشى سادىر قىلىنغان بولۇپ، تۈركىيە جۇمھۇرىيىتى تاشقى ئىشلار مىنىستىرلىقى بۇ قەبىھ قىلمىشلارغا قاتتىق نارازىلىق بىلدۈرۈپ، ۋەقەنىڭ جاۋابكارلىرىنىڭ مەسئۇلىيىتىنى سۈرۈشتە قىلىشنى تەلەپ قىلغانىدى.

دىپلوماتىك مەنبەلەردىن ئىگىلەنگەن ئۇچۇرلارغا قارىغاندا، يۇقىرىقى ئۆزگىرىشلەر نەزەردە تۇتۇلۇپ، فېۋرال ئېيىدا ئۆتكۈزۈلۈشى پىلانىلىۋاتقان ئۈچ تەرەپ مېخانىزم يىغىنى كېچىكتۈرۈلگەن.

تۈركىيە 28-ئىيۇن (2022) ئىسپانىيەنىڭ پايتەختى مادرىدتا ئۆتكۈزۈلگەن ناتو باشلىقلار يىغىنى جەريانىدا، ناتوغا ئەزالىق ئىلتىماسى سۇنغان فىنلاندىيە بىلەن شىۋېتسىيەنىڭ تەلەپلىرىنى رەت قىلىپ، تېررورلۇق تەشكىلاتلىرىنى ئوچۇق-ئاشكارا قوللايدىغان مەزكۇر ئىككى دۆلەت بىلەن تېررورچىلارغا يانتاياق بولماسلىق توغرىسىدا كېلىشىم ئىمزالىغانىدى؛ ئەنقەرە، نۆۋەتتە كېلىشىمدە ۋەدە قىلىنغان قەدەملەرنىڭ تاشلىنىشىنى كۈتمەكتە.