mewlut chawushoghlu biraziliyede muhim uchrishishlarda boldi
mewlut chawushoghlu biraziliyede 3 dölet tashqi ishlar ministirliri bilen ayrim-ayrim uchrishish élip bardi.
türkiye awazi radiyosi xewiri: tashqi ishlar ministiri mewlut chawushoghlu biraziliyede döletning tashqi ishlar ministirliqigha yéngi teyinlengen maoro wéyra, gwatémala tashqi ishlar ministiri mariyo adolfo bujaro florés we gabon tashqi ishlar ministiri maykél musa adamu bilen ayrim-ayrim uchrishish élip bardi.
mewlut chawushoghlu tiwittér hésabida hembehirligen uchurida, 1 - yanwarda pirézidéntliq wezipisini tapshurup alidighan luyiz inakiyo lula da silwaning qesem bérish murasimigha qatnishish üchün biraziliyege yétip barghanliqini we bu jeryanda hem gwatémala, hem gabon tashqi ishlar ministirliri bilenmu körüshkenlikini bildürdi.
chawushoghlu biraziliyede tunji uchrishishni döletning tashqi ishlar ministiri bolup yéngi teyinlengen wéyra bilen bashlighanliqini we ikkinchi uchrishishida gwatémalaliq mensepdishi florés bilen körüshkenlikini eskertip, «biz iqtisad, mudapie sanaiti we medeniyet sahesidiki munasiwetliritimizni yaxshilaymiz» dédi.
ministir chawushoghlu 2022 - yilining eng axirqi ikki tereplik uchrishishni gabonliq mensepdishi adamo bilen ötküzgenlikini bildürüp, «mudapie sanaiti we iqtisadiy munasiwitimizni shundaqla ministirliqlirimiz otturisidiki hemkarliqni muzakirileshtuq» dédi.
