әрдоған: куба билән һәмкарлиқни күчәйтиш ирадимиз қәтий

түркийә авази радийоси хәвири:  җумһур рәис рәҗәп таййип әрдоған түнүгүн (23-нойабир) түркийәдә дөләт ишлири зийаритидә болуш үчүн әнқәрәгә йетип кәлгән куба пирезиденти мигуел марийо диаз-канел бермудезни рәсмий мурасим арқилиқ қарши алди.

 әрдоған билән бермудезайрим көрүшти вә һәйәтләр ара учришиштин кейин, икки дөләт оттурисида һасил қилинған келишимләрни имзалаш мурасимиға қатнашти. имза мурасимидин кейин, қошма ахбарат елан қилиш йиғини өткүзүлди.

әрдоған бермудез билән көрүшүшидә түркийә – куба мунасивәтлири һәққидә кәң даирилик музакирә елип барғанлиқлирини тәкитләп мундақ деди: «икки дөләт оттурисидики һәмкарлиқимизни күчәйтиш мәсилисидә ирадимизниң қәтийликидин интайин хурсәнмиз. мунасивәтлиримизниң әмәлий йошурун күчиниң астида қелишиға кубаға узун йиллардин буйан йүргүзүлүватқан бир тәрәплимә ембарголарниң тәсир көрсәткәнлики наһайити ениқ.»

бермудез билән түркийә – куба сода омумий соммисини 200 милйон долларға йәткүзүшни қарарлаштурғанлиқлирини әскәрткән җумһур рәис әрдоған, мундақ дәп көрсәтти: «бу һәқтә, алди билән енергийә, сайаһәт, бинакарлиқ, деһқанчилиқ, тәрәққийат, сәһийә вә муһит асраш қатарлиқ саһәләрдики һәмкарлиқни тәрәққий қилдуруш имканийәтлири һәққидә музакирә елип бардуқ. ембарголар сәвәб болуватқан қийинчилиқларға қаримай, ширкәтлиримизниң кубаға көңүл бөлүшиниң күнсери күчийиватқанлиқини көрүватимиз.»

меһман пирезидент бермудез мундақ деди: «сода, пул-муамилә мунасивәтлиримиз вә икки дөләт оттурисидики һәмкарлиқни техиму көп сәрхиллаштуруш мәсилисидә пүтүштуқ.»

бермудез җумһур рәис әрдоғанға, һәр икки тәрәпкә пайдилиқ болидиған шәкилдә бийотехника, қайта һасил болидиған енергийә, сайаһәт, деһқанчилиқ, чарвичилиқ, сәһийә, маарип вә мәдәнийәт қатарлиқ саһәләрдә давамлиқ һәмкарлиқ орнитишни халайдиғанлиқлирини билдүрди.

җумһур рәис рәҗәп таййип әрдоған куба пирезиденти бермудезниң шәрипигә кәчлик тамақ зийапити бәрди.