kalin barliq tereplerni ashliq yötkesh kélishimige boysunushqa chaqirdi

türkiye awazi radiyosi xewiri: jumhur reislik mehkimisining bayanatchisi ibrahim kalin s n n téléwiziyesining mexsus pirogrammisigha qatniship, türkiye, rusiye, ukraina we b d t arisida imzalanghan «ashliq we ashliq mehsulatlirining ukraina portliridin bixeter yötkesh kélishimi» toghrisida toxtaldi.

u barliq tereplerni kélishimge boysunushqa, mezkur kélishimning her qandaq herbiy hujumgha uchrimasliqini, ukraina we rusiyedin ashliq éksportigha tosqunluq qilmasliqqa chaqirdi.

u istanbulda jüme küni (22-iyul) imzalanghan kélishimning dunya ashliq bixeterliki üchün éytqanda paydiliq ikenlikini eskertip: «bu jeryanda her bir qedemni diqqet bilen basimiz, weziyetni yéqindin közitimiz. rusiye we ukraina rehberliri bilen dawamliq qoyuq alaqe qilimiz. ashliq yötkesh üchün istanbulda qurulidighan merkezde, türkiye we b d t din bashqa, rusiye bilen ukrainaning wekillirimu bolidu. merkez qurulghandin kéyin, birinchi paraxotning bir qanche hepte ichide yolgha chiqishini ümid qilimiz. elwette, qanchilik qisqa bolsa shunchilik yaxshi. bu rusiye bilen ukrainaning paraxotlirini qachan ewetishke teyyar ikenlikige baghliq. yötkesh bashlanghanda ishlar yaxshilinip kétidu dep oylaymen» dédi.

u urush bashlanghandin kéyin, gherbning rusiyege qarshi émbargo yürgüzgenlikini, moskwa hökümitining tebiiy gazni qoral süpitide émbargo yürgüzgen döletlerge qarshi paydilanghanliqini؛ bu weziyetni urush axirlashqiche dawamlishidu dep qaraydighanliqini bildürdi.

u mundaq dédi:

«shunga, barliq tereplerni muzakirege chaqirimiz. bu yerde bek ümidwar bolmaqchi emesmen, emma ashliq kélishimi eslide urush toxtitish söhbetlirining qaytidin bashlinishigha, esirlerni özara almashturushqa we axirida tinchliq kélishimining imzalinishigha yol achalaydighan xildiki ishenchning turghuzulushigha asas yaritip bérishi mumkin.»