б д т: афғанистан 1 милйон 200 миң қиз оттура мәктәп маарипидин мәһрум қалди
афғанистандики 1 милйон 200 миң қиз оттура мәктәп маарипни давамлаштуруштин мәһрум қалмақта.
түркийә авази радийоси хәвири: бирләшкән дөләтләр тәшкилати кишилик һоқуқ алий комиссари мишел бачелет, б д т кишилик һоқуқ кеңишиниң 50-қетимлиқ йиғини даирисидә чақирилған «афғанистандики айаллар вә қизларниң һоқуқи» темилиқ йиғинға қатнишип сөз қилип, афғанистандики иқтисадий вәйранчилиқ сәвәбидин «айаллар башчилиқидики аилә әзалириниң %90 иниң ачарчилиқ йаки йемәклик бихәтәрликиниң тәсиригә учраватқанлиқи»ни оттуриға қойди.
һәр хил кәсиптики айалларға қаритилған зораванлиқниң күчәйгәнликини тәкитлигән бачелет, айалларға қойулған кийим-кечәк вә һәрикәт чәклимисиниң айаллар арисида писхикилиқ кесәлликләрни пәйда қилғанлиқини илгири сүрүп, «дөләт иқтисадиниң пүтүнләй йимирилишигә әгишип, ишсиз айаллар сани шиддәт билән ашти вә нурғун айаллар башқуридиған карханилар тақиветилди» деди.
талибан вақитлиқ һөкүмитиниң бәргән вәдилиригә қаримай, айалларниң маарип һоқуқиға қойулған чәклимиләрни давамлаштуруватқанлиқини билдүргән бачелет: «1 милйон 200 миң қиз оттура мәктәп маарипини давамлаштуралмайватиду» деди.
