chawushoghlu kosowu pirézidénti we bash ministiri teripidin qobul qilindi

türkiye awazi radiyosi xewiri: kosowu pirézidéntliq mehkimisi türkiye tashqi ishlar ministiri mewlüt chawushoghluning pirézidént wyosa osmani teripidin qobul qilinghanliqi toghrisida bayanat élan qildi.

bayanatta, osmani bilen chawushoghluning «ésil döletler ara munasiwetler» ni testiqlighan muhim uchrishishni emelge ashurghanliqi bildürüldi.

körüshüshte, tashqi siyaset, mudapie, soda, her qaysi sahelerde ikki terep hemkarliqidin bashqa, rayon we yawropaning nöwettiki weziyiti qatarliqlar muzakire qilindi.

kosowu pirézidénti wyosa osmani gherbiy balqan rayonining yawropa-atlantik qurulmilirigha qoshulushining, rusiyening rayondiki nopuzi we weziyetni muqimsizlashturush xahishining aldini alghanliqini bildürüp: «türkiye jumhur reisi rejep tayyip erdoghanning kosowuning nato we bashqa xelqaraliq organlargha eza bolushini éniq qollighanliqigha apirin oquymen. türkiyening kosowuning yawropa kéngishige namzat bolushini qollishighimu köp éhtiyajliqmiz» dédi.

u kosowu bilen türkiye otturisidiki munasiwetlerning istratégiyelik ikenlikini eskertip, türkiyening kosowuning natodiki asasliq shérikliridin biri ikenlikini, kosowudiki türkler bilen türkiyediki albanlarning ikki dölet otturisida köwrüklük rol oynawatqanliqini qeyt qildi.

u ikki dölet otturisidiki munasiwetlerning, bolupmu meblegh sélish we kosowuning türkiyege mal éksport qilish saheliride ghayet zor yoshurun küchning barliqini bildürdi.

mewlüt chawushoghlu kosowu bash ministiri albin kurti bilen körüshkendin kéyin, twittérda bu heqte uchur hembehirlidi.

u: «kosowu bash ministiri kurti bilen özara hemkarliqlirimizni tereqqiy qildurush imkaniyetlirini muhakime qilduq. fethullahchi térrorluq teshkilatining mewjut bolup turushining kosowu üchün peyda qilidighan tehditini tekitliduq» dédi.