«түркийәниң җәнубий чегра линийәлиридики һәрбий һәрикәтләр қошна әлләрниң тинчлиқини қоғдимақта»
дөләт хәвпсизлик кеңиши түркийәниң җәнубий чегра линийәлиридики һәрбий һәрикәтләрниң һәм миллий еһтийаҗларниң тәқәззаси һәм қошна әлләрниң тинчлиқини қоғдаватқанлиқини билдүрди.
түркийә авази радийоси хәвири: түркийә дөләт хәвпсизлик кеңиши йиғини, җумһур рәис рәҗәп таййип әрдоғанниң рийасәтчиликидә чақирилди.
йиғиндин кейин елан қилинған байаннамидә, мундақ дейилди: «җәнубий чегра линийәлиримиздә давамлаштурулуватқан һәрбий һәрикәтләрниң нишани һәргизму қошнилиримизниң земин пүтүнлүки болмастин, әксичә һәм миллий бихәтәрлик еһтийаҗимизниң тәқәззасидур, шундақла, чегра һалқиған һәрбий һәрикәтләрму қошна әлләрниң тинчлиқини қоғдимақта.»
терроризмни қоллап, хәлқара қанунни дәпсәндә қиливатқан дөләтләр бу позитсийәсидин ваз кечишкә чақириқ қилинған байаннамидә, «хәлқара иттипақларда һәрдаим иттипақдашлиқ роһи вә қануниға изчил риайә қилип келиватқан түркийә, иттипақдашлиридин охшаш мәсулийәт вә сәмимийәтни күтмәктә» дейилди.
җумһур рәис рәҗәп таййип әрдоған, дүшәнкә күни чақирилған министирлар кеңиши йиғинидин кейин елан қилған байанатида, мундақ дегәниди: «җәнубий чегра линийәлиримизни бойлап 30 километир чоңқурлуқта бихәтәр районларни бәрпа қилиш үчүн ишқа кириштүргән паалийәтлиримизниң кәм қалған қисимлириға мунасивәтлик йеңи қәдәмләрниму ташлашқа башлидуқ. дөлитимизгә вә бихәтәр районлиримизға даим қилиниватқан һуҗумларниң мәркизи һесаблинидиған районлар, һәрбий һәрикитимизниң әң муһим нишанидур. қораллиқ қисимлиримиз, дөләт хәвпсизлик күчлиримиз вә ахбаратлиримиз тәййарлиқ хизмәтлирини тамамлиған һаман, бу һәрикәтләр башлиниду.»
