әрдоған қуддус дәвасини йуқири аваз билән давамлаштуридиғанлиқини билдүрди

түркийә авази радийоси хәвири: җумһур рәис, қошумчә адаләт вә тәрәққийат партийәси рәиси әрдоған, партийәсиниң түркийә бүйүк миллий мәҗлисидики гуруппа йиғинида сөз қилип: «қуддустики әләқса мәсҗидиниң шәхсийитигә қилинған йеқинқи күнләрдики йеңи һуҗумлар қәлбимизни йәнә бир қетим дағлиди» деди вә сөзини давамлаштуруп: «биз көрүшкән һәр бир исраилийәлик рәһбәргә қуддусниң салаһийити тоғрисидики сәзгүрлүкимизни очуқ-ашкара ипадиләп кәлдуқ, шундақ қилишни давамлаштуримиз. хәлқара җәмийәтни пәләстинликләргә қилинған адаләтсизликкә сәзгүр болушқа чақирдуқ, чақиришни давамлаштуримиз. бу мәсилиниң маһийити вә у кәлтүрүп чиқиридиған еғир ақивәтләрниң ениқ болушиға қаримай, қәстән һалда мушундақ муамилә қилиниватқан болса, у һалда бу башқа пиланларниң барлиқини көрситиду. бизниң исраилийә билән сийасий вә иқтисадий мунасивитимиз үчүн басқан қәдәмлиримиз башқа, қуддус дәваси башқидур. пүтүн дунйа сүкүт қилған тәқдирдиму, биз қуддус дәвамизни әң йуқири аваз билән давамлаштуримиз» дегәнләрни қәйт қилди.

җумһур рәис әрдоған бирләшкән дөләтләр тәшкилати (б д т) баш катипи антонийо гутеррес, пәләстин дөләт рәиси мәһмуд аббас, ийорданийә падишаһи абдуллаһ әлһусәйин вә исраилийә пирезиденти исһақ һерзог билән өткүзгән телефон сөһбәтлиридә, өзлириниң бу мәсилидики мәйданини ипадилигәнликини әскәртип, «биз бу мубарәк күнләрдә қуддуста йүз бериватқан зулумниң ахирлишишини халаймиз» деди.