әрдоған сәнәтчиләргә ифтар бәрди

түркийә авази радийоси хәвири: җумһур рәис әрдоған түнүгүн истанбул долмабаһчә сарийида сәнәтчиләр билән көрүшкән иптар программисидики нутуқида, тәрәққийат йолида илгириләватқан җәмийәтләрни бир-биридин пәрқләндүридиған өзгичиликини әң йахши усулда оттуриға қойидиған пәрқниң бинакарлиқтин музикиғичә кәң даирини өз ичигә алидиған күлтүр - сәнәт мәһсулатлири икәнликини билдүрди.

әрдоған: «сәнәтчи җәмийәтниң әйникидур, җәмийәтниң байлиқи, хушаллиқи, дәрди вә хийали сәнәтчисини  шәкилләндүриду вә йетәкләйду» деди һәмдә илһамини бу тупрақтин, бу милләттин, бу мәдәнийәттин алған һечқандақ сәнәт әсириниң мәғлуп болмайдиғанлиқиға ишинидиғанлиқини тәкитләп йәнә мундақ деди:

«бизму қоллашлиримиз билән сәнәтчилиримизниң йенида туруп кәлдуқ. буниңдин кейинму йенида турушни давамлаштуримиз. әнқәрәдә җумһур рәислик симфонийә оркестирасиниң йеңи бинаси вә истанбулда ататүрк күлтүр мәркизини хизмәткә ечип, дөлитимизни дунйави сәвийәдики сәнәт мәркизигә игә қилдуқ. бүйүк вә күчлүк түркийә қурулушидики әң муһим вәзипиләрниң бири әмдиликтә сәнәтчилиримизниң йәлкисидә. күлтүр вә сәнәт билән таҗландурулмиған бир тәрәққийат һәрикити пәқәтла таштин, бетондин, төмүрдин, шешидин вә металдин ибарәт болуп қалиду. һалбуки биз қуп қуруқ тәрәққийат һәрикитини әмәс, бәлки бир мәдәнийәт гүллинишини нишан қилдуқ. буни иншааллаһ силәр билән бирликтә әмәлгә ашуримиз».

бу арилиқта, җумһур рәис әрдоғанниң айали әминә әрдоғанму сәнәткарлар билән иптардин кейин иҗтимаий алақә торида һәмбәһирлигән учурида, «сәнәткарлар җамаәтчиликидики қиммәтлик кишиләр билән бир йәргә җәм болуп, йеқимлиқ бир кәчни өткүздүқ. әсәрлири билән қәлбләрни тәсирләндүргән сәнәткарлиримиз мувәппәқийәтлири билән күлтүр вә сәнәт мираслиримизда мәңгүлүк изларни қалдуриду. мән уларниң төһписи вә иштираклири үчүн рәһмәт ейтимән» дегән сөзләрни ишләтти.