әрдоған: украинаниң игилик һоқуқиға сәл қарайдиған қанунсиз қәдәмләрни қобул қилалмаймиз

түркийә авази радийоси хәвири: җумһур рәис рәҗәп таййип әрдоған анталйа дипломатийә мунбиридә сөз қилди.

у түркийәниң ақдеңиз, һәм қара деңиз дөлити икәнликини билдүрүп: «украина билән русийә қарадеңиздики қошнилиримиз һесаблиниду. қошнилиримиз оттурисидики киризисниң урушқа айланғанлиқидин чоңқур қайғуруватимиз. йирикчиликләрниң улғийип бу нуқтиға келиши һәммидин бәк бизни биарам қилди, һәммидин бәк биз әндишәләндуқ. қошнимиз болған бир дөләтниң игилик һоқуқиға қаритилған таҗавузчилиқ һәрикитини һәргизму қобул қилалмаймиз. сәгәклик вә тәмкинликниң ғалип чиқишини вә қорал-йарағларниң балдуррақ җимиқтурулушини үмид қилимиз. районимизда сүлиһ вә сүкүтниң һөкүмран қилиниши үчүн монтрө келишиминиң дөлитимизгә бәргән һоқуқлардин пайдилинишни өз ичигә алған һәр түрлүк тиришчанлиқларни давамлаштуримиз» деди.

у қиримниң қанунсиз бесивелинғанлиқи қатарлиқ украинаниң земин пүтүнлүкини көзгә илмиған қанунсиз қәдәмләрни түркийә болуш сүпитидә рәт қилдиғанлиқлирини әскәртип: «қиримға мунасивәтлик мәйданимизни 2014-йили һәр қайси мунбәрләрдә ениқ оттуриға қойдуқ. русийәлик достлиримиз йаки украиналиқ достлиримиз билән болған барлиқ көрүшүшлиримиздә, бу мәсилини күнтәртипкә қойдуқ. әгәр ғәрб, пүткүл дунйа 2014-йили авазини чиқарған болса, бүгүн буниңға дуч келәмтуқ? әйни вақитта қиримниң ишғал қилинишиға аваз чиқармиғанлар, әмди бир нәрсиләрни дәватиду. ундақта йахши, адаләт бу дунйаниң мәлум җайида күчкә игә, бәзи җайлирида инавәтсизму? бу қандақ дунйа?

наһайити әпсуски хәлқаралиқ җәмийәт бу адаләтсизликләрни түгитиш үчүн сәзгүрлүкини көрсәтмиди, зөрүр йардәмләрни қилмиди. украина өзиниң адил ишлирида йалғуз қалди. мана бүгүнки күндә, күчлүк ирадә дәл вақтида намайан қилинған болса, дипломатийәдә һәл қилғили болидиған мәсилиләрниң бузғунчилиқ вә азаблиқ ақивәтлиригә дуч кәлмигән болаттуқ. өй-маканлиридин айрилған пуқраларни, қорқунч вә әндишәләргә толған балиларни, харабиликтики шәһәрләрни, бигунаһ кишиләрниң өлүшини көргинимиздә қайғу-һәсритимиз шиддәт билән ашиду» деди.

у ахирида, дунйадики муқимсизлиқ вә урушлар сәвәбидин милйонларчә кишиниң өй-маканлиридин айрилишқа мәҗбур қеливатқанлиқини билдүрүп: «ачарчилиқ вируси һәр йили вухән вирусидин бәкрәк техиму көп кишиләрниң җениға замин болмақта. бүгүн йәр йүзидә һәр 10 секунтта бир кичик бала бир лоқма нан, бир йутум су тапалмиғанлиқи үчүн җенидин айриливатиду. муқимсизлиқ вә урушлар сәвәбидин милйонларчә киши өй-маканлиридин айрилишқа мәҗбур қеливатиду» деди.