әрдоған: «қанал истанбул» истанбул боғузидин 13 һәссә бихәтәр
җумһур рәис рәҗәп таййип әрдоған, тәкшүрүш нәтиҗилириниң, «қанал истанбул»дики парахот қатнишиниң истанбул боғузиға қариғанда 13 һәссә бихәтәр болидиғанлиқини оттуриға қойғанлиқини ейтти.
түркийә авази радийоси хәвири: җумһур рәис әрдоған милләт кутупханисида ишқа ашурулған үчинчи қетимлиқ кутупхана сөһбитидә докторантлар билән учришип, уларниң соаллириға җаваб бәрди.
«қанал истанбул» қәдимини бесишниң зөрүрлүкини тәкитләп, истанбул боғузиниң һәр вақит муһит қирғинчилиқи тәһдити пәйда қилиш еһтимали барлиқини оттуриға қойған әрдоған, истанбул боғузиниң бәзи җайлириниң парахотларни борулуш қийинчилиқиға дучар қиливатқанлиқини әскәртти.
әрдоған истанбул боғузида йүз бәргән илгирики вәқәләрни мисал қилип: «биз чоқум бу апәтләрдин савақ елишимиз керәк. болупму һәр йили 45 миң парахот өтидиған истанбул боғузиниң бу қатнашни техиму ашуруп қобул қилиши мумкин әмәс. тәкшүрүш доклатлириға қариғанда, 2050- йилиға барғанда бу сан 78 миңға йетидикән, қатнаш үзлүксиз көпийидикән. һалбуки, истанбул боғузиниң парахотларни бихәтәр өткүзүш иқтидари аран 25 миң. истанбул боғузидин парахотларниң өтүшини тосуп қалалмиған икәнмиз, көпийиватқан қатнашқа тақабил туруш үчүн алдимиздила пәқәт бирла йол бар иди, у болсиму қанал истанбул» деди.
тәкшүрүш нәтиҗилириниң, «қанал истанбул»дики парахот қатнишиниң истанбул боғузиға қариғанда 13 һәссә бихәтәр болидиғанлиқини оттуриға қойғанлиқини тәкитлигән әрдоған, сөзини давамлаштуруп: «һазир алдимизда 13 һәссә бихәтәр бир әһвал бар икән, бизниң йәнила қанал истанбул қурулушиға қарши чиқишимизниң әһмийити барму? биз нефит парахотлири, чоң йүк парахотлири қатарлиқларниң истанбул боғузидин өтүшини тохтитип, һәммисини қанал истанбулға буришимиз керәк» дегәнләрни сөзлиригә илавә қилди.
