чавушоғлу исираилийәниң қандақ сийасәт йүргүзидиғанлиқиниң муһим икәнликини билдүрди

түркийә авази радийоси хәвири: ташқи ишлар министири мәвлүт чавушоғлу пайтәхт әнқәрәдә зийарәттә болуватқан того ташқи ишлар министири, африқа маслишиш вә чәт әлләрдики тоголуқлар министири роберт дуссей билән ташқи ишлар министирлиқида көрүшкәндин кейин, ортақ ахбарат елан қилиш йиғини өткүзди.

мәвлүт чавушоғлу, «исираилийәдә һөкүмәт тәшкилләш хизмәтлири вә йеңи тәшкиллинидиған һөкүмәттин күтидиғанлири» тоғрисидики соалға: «һөкүмәт тәшкилләш иши, исираилийәниң ички ишидур. исираилийәдә һөкүмәтни кимниң тәшкилләйдиғанлиқи әмәс, тәшкиллинидиған һөкүмәтниң қандақ сийасәт йүргүзидиғанлиқи муһим. исираилийәдә қандақ һөкүмәтниң тәшкиллинишидин қәтийнәзәр, биз билән сағлам мунасивәтләрни давамлаштуралиши үчүн алди билән хата сийасәтләрдин ваз кечиши лазим. исираилийә пәләстингә қиливатқан һуҗумлирини тохтитиши  вә икки дөләтлик һәл қилиш чарисиға зийан салидиған қәдәмләрдин ваз кечип, тинчлиқ мусаписиға қайтип келиши керәк. исираилийә йеқинқи вақитларда қанунсиз туралғулар мәсилисидә йәнә қәдәм ташлиди. түркийә ташқи ишлар министирлиқи болуш сүпитимиз билән, бу мәсилә тоғрисида байанат елан қилдуқ. исираилийә бу сийасәтләрдин ваз кечиши вә қуддусниң салаһийтигә зийан салидиған қәдәмләрдин ваз кечиши керәк» дәп җаваб бәрди.

у исираилийә билән сағлам мунасивәтләр орнитилиши үчүн, бу сийасәтләрдин ваз кечиши керәкликини әскәртип: «исираилийә бу сийасәтлирини давамлаштурса, бизниң сағлам мунасивәтләр орнитишимиз мумкин әмәс. исираилийә икки дөләтлик һәл қилиш чариси вә тинчлиқ мусаписиға қайтип кәлсә, пәләстинликләрниң һәқ-һоқуқлириға һөрмәт қилса, биз биләнла әмәс, бәлки һәммә дөләтләр билән болған мунасивәтлири техиму сағлам болиду» деди.