әрдоған кишилик һоқуқ күни мунасивити билән телеграмма тарқатти

түркийә авази радийоси хәвири: әрдоған 10 – декабир дунйа кишилик һоқуқ күни мунасивити билән тарқатқан телеграммисида, бирләшкән дөләтләр тәшкилати (б д т) кишилик һоқуқ хитабнамиси мақулланғанлиқиниң 72 – йилида түркийә пуқралири вә пүткүл инсанийәтни тәбриклиди.

әрдоған, буниңдин 72 йил илгири техиму адил, техиму әркин, техиму инсанни мәркәз қилған бир дунйа қуруп чиқиш мәқсити билән қобул қилинған кишилик һоқуқ хитабнамисиниң хәлқара җәмийәткә мәсулийитини әслитидиған муһим һөҗҗәт болуштәк алаһидиликини һелиһәм сақлап келиватқанлиқини билдүрүп, башқуруш систмиси «хәлқни йашнат, дөләт йашнисун» пиринсипи үстигә қурулған бир дөләт болуш сүпити билән түркийәниң, ислаһатларни йолға қойуш арқилиқ пуқраларниң һоқуқи вә әркинликини чәкләйдиған нурғун тосалғуларни елип ташлиғанлиқини қәйт қилди.

җумһур рәис әрдоған,  бүгүнки дунйа кишилик һоқуқ хитабнамиси дуч келиватқан әң еғир тәһдитниң мәдәнийәт ирқчилиқи, чәт әллик өчмәнлики вә исламға өчмәнлик қилиш икәнликини оттуриға қойуп, ғәрб җәмийәтлиридә ковид  - 19 йуқуми билән тәң етиқад вә ибадәт әркинликини өз ичигә алған кишилик һоқуқ хитабнамиси арқилиқ капаләт астиға елинған һәқ- һоқуқлардин бәһримән болушниң тосқунлуққа учриғанлиқини әскәртти.

әрдоған сөзини давамлаштуруп, «биз милйардларчә мусулманлар йашаш һоқуқидин тартип адил сотлиниш һоқуқиғичә болған асасий әркинликлири айақ асти қилинған, пикир әркинлики тони астида  муқәддәс қиммәт қариши һақарәтлиниватқан, өчмәнлик тили ахбарат вә пирезидентлар сәвийәсидә тәшвиқ қилиниватқан қорқунчлуқ картиниға дуч кәлдуқ. ковид  - 19 йуқум әһвалидин кейин қайта шәкиллинидиған дунйадики барлиқ сийасәтләр кишилик һоқуқни чөридәп қурулуп, адаләтсизликни түгитиштики үнүмлүк механизмларни тәрәққий қилдуруш керәк» деди.

әрдоған, түркийәниң асасий әркинликләрни қоғдашни вә дунйа кишилик хитабнамиси арқилиқ буниңдин 72 йил илгири капаләт астиға елинған һоқуқлириға һелиһәм еришәлмигән  милйонлиған кишиләргә үмид чириғи болушни давамлаштуридиғанлиқини сөзлиригә илавә қилди.