чавушоғлу чәтәлләрдә вухән вируси сәвәбидин қаза қилған түркийә пуқралири һәққидә тохталди
ташқи ишлар министири мәвлут чавушоғлу чәтәлләрдә 32 түркийә пуқрасиниң йеңи типтики вухән вируси сәвәбидин қаза қилғанлиқини билдүрди.
түркийә авази радийоси хәвири: пайтәхт әнқәрәдә чәтәлләрдин елип келингән түркләр тоғрисидики әң йеңи әһвал һәққидә мәлумат бәргән чавушоғлу бу қетим 11 нөвәтчи айропилан билән 8 дөләттин 2721 оқуғучиниң дөләткә елип келингәнлики вә карантинаға елинғанлиқини елан қилди.
мәвлут чавушоғлу чәтәлләрдә 32 түркийә пуқрасиниң вухән вируси сәвәбидин қаза қилғанлиқини билдүрүп, уларниң җиназилириниң түркийәгә елип келинидиғанлиқини ейтти.
чавушоғлу бәзи дөләтләргә әвәтилгән тиббий әслиһәләр үстидиму тохтилип, 69 дөләттин тиббий әслиһә йардәм тәлипи кәлгәнликини вә 17 дөләткә әвәткәнликини байан қилди.
чавушоғлу испанийә ташқи ишлар министири билән көрүшкәнликини вә түркийәдин маска тәләп қилғанлиқиниму әскәртип, тиббий әслиһә йардими һәққидә, «хәлқара җамаәтчилик һәрқандақ чағдикигә қариғанда техиму көп һәмкарлишиши керәк» деди.
мәвлут чавушоғлу: «дөләт болуш сүпитимиз билән биз өз вәзипимизни ада қиливатимиз, алақзадә болушниң һаҗити йоқ, биз бу җәрйанларни бирликтә йеңимиз»деди.
