түркийә қиримниң русийә тәрипидин қошувелинишиниң қанунсизлиқи тоғрисида байанат елан қилди

түркийә авази радийоси хәвири: түркийә, русийәниң украинаға қарашлиқ қирим аптоном җумһурийитини қанунсиз шәкилдә өзигә қошувелишиниң алтинчи йили мунасивити билән байанат елан қилип, әнқәрәниң қанунсиз қошувелишни етирап қилмайдиғанлиқини, украинаниң земин пүтүнлүки вә игилик һоқуқиниң қоғдилишини һимайә қилидиғанлиқини тәкитлиди.

түркийә җумһурийити ташқи ишлар министирлиқи йазма байанат елан қилип, «украина (ға қарашлиқ) қирим аптоном җумһурийитиниң буниңдин 6 йил бурунқи бүгүнки күндә өткүзүлгән бир қетимлиқ қанунсиз омумий хәлқ беләт ташлаш паалийити арқилиқ русийә федератсийәси тәрипидин қанунға хилап шәкилдә қошувелинишиниң, түркийә вә хәлқара җәмийәт тәрипидин етирап қилинмиғанлиқи»ни тәкитләп өтти.

байанатта, «қиримниң асасий хәлқи болған қирим татар түрклириниң тарихий вәтәнлиридә есәнлик вә бихәтәр йашашлири, мәдәнийәт кимликлирини қоғдап қелишлири вә қошувелишни мәнбә қилған талапәтләрниң орниниң толдурулуши түркийә нуқтисидин муһим орунда турушни давамлаштуриду.

түркийә, истратегийәлик шерики болған украинаниң земин пүтүнлүкигә вә игилик һоқуқиға болған қоллишини бу мунасивәт билән йәнә бир қетим тәкитләп өтиду» дейилди.