әнқәрә мисирниң дипломатийә вәкилини министирлиққа чақиртип наразилиқини йәткүзди

түркийә авази радийоси хәвири: дипломатик мәнбәләрдин игиләнгән учурға асасланғанда, анадолу агентлиқиниң қаһирә ишханиси хизмәтчилириниң назарәт астиға елинишидин кейин ташқи ишлар министирлиқиға чақиртилған мисирниң әнқәрәдә турушлуқ дипломатийә вәкилигә түркийәниң наразилиқи йәткүзүлгән.

түркийә билән мисир арисидики дипломатик мунасивәтләр 2013 – йилидин буйан өзара дипломатик вәкил турғузуш сәвийәсидә давамлаштурулмақта.

мисир сақчилири түнүгүн анадолу агентлиқиниң қаһирәдики ишханисиға бастуруп кирип, бири түркийә пуқраси болуп җәмий 4 хизмәтчини назарәт астиға елип намәлум бир җайға елип кәткәниди.

ишханиға саәт 18:00 әтрапида киргән мисир сақчилири, аманлиқ камералирини тақап, интернетни тақивәткәндин кейин әтигәнгичә ишханини тәкшүргән, хизмәтчиләрниң паспорт, йанфон вә компйотерлирини тартивелип сирт билән алақә орнитишиға тосқунлуқ қилғаниди.

мисир сақчилири вәқәдин кейин ишханиға барған анадолу агентлиқи адвокатиға тәкшүрүш сәвәби тоғрисида мәлумат беришни рәт қилғаниди.

анадолу агентлиқи вә түркийәниң қаһирәдики әлчиханисиниң адвокатлири, мухбирларниң немишқа назарәт астиға елинғанлиқи вә қәйәргә елип кетилгәнлики тоғрисида мисир даирилиридин мәлумат тәләп қилған болсиму һазирғичә һечқандақ җавабқа еришәлмиди.