түркийә гиретсийә баш министириға қаттиқ наразилиқ билдүрди

түркийә авази радийоси хәвири: байанатчи һами ақсой, гиретсийә баш министири кирйакос мичотакисниң тәшвиқат характерлик сөзлиригә алақидар бир соалға йазма һаләттә қайтурған җавабида, мичотакисниң түркийәгә қарита қилған дүшмәнләрчә сөзлиригә наразилиқ билдүрүп, «гиретсийә баш министири кирйакос мичотакисниң <хәлқара ирқий қирғинчилиқ җинайити йиғини> дегән нам астида 2019 – йили 6 – декабирдин 8 – декабирғичә атинада ечилған йиғинда қилған сөзидә, тарихимизға вә бүгүнгә қарита қилған асассиз, йалған шундақла төһмәткә толуп кәткән дүшмәнләрчә дәвалирини рәт қилимиз» деди.

гирик рәһбәрлириниң азадлиқ урушида әгә деңизиға төкүлгәнликини унуталмиғанлиқини билдүргән ақсой, «гиритсийә рәһбәрлик аппарати тарихи билән йүзлишишни халиса, алди билән гирик армийәсиниң анадолуни ишғал қилиш әснасида садир қилған җинайәтлирини ениқлап чиққан иттипақдаш дөләтләр тәкшүрүш комитетиниң доклати билән түркләргә йүргүзгән қәтлам вә зулумлири үчүн гиретсийәни төләм төләшкә һөкүм қилған лозан хитабнамиси һөкүмлиригә қарап чиқиши керәк» дегәнләрни қәйт қилди.

у, хийалпәрәс идеологийәләрни қойуп йахши қошнидарчилиқ мунасивәтлиригә мәркәзлишишиниң әһмийитини тәкитләп, «гиритсийә рәһбәрлик аппаратини ишғалчи гиритсийә қошунлириға қарши күрәш қилип, түркийә җумһурийитини қуруп чиққан улуғ даһи ататүркни нобел тинчлиқ мукапатиға намзат көрсәткән гиретсийә баш министири венизелосниң йолидин меңип, хийалпәрәс идиологийәлирини бир йанға қайрип қойуп, достлуқ вә йахши қошнидарчилиқ пиринсипилириға игә чиқишқа чақиримиз» деди.