чавушоғлу йапонийә ташқи ишлар вәзири билән көрүшти

түркийә авази радийоси хәвири: ташқи ишлар министири мәвлүт чавушоғлу G20 дөләт гуруһи ташқи ишлар министирлири йиғиниға қатнишиш үчүн йапонийәниң нагойа шәһиригә йетип берип, ташқи ишлар вәзири монтеги тошимитсу билән көрүшти.

йапонийә ташқи ишлар вәзири монтеги тошимитсу: «йапонийә истратегийәлик шерики вә райондики чоң дөләт түркийә билән болған мунасивәтлиригә интайин әһмийәт бериду. чавушоғлу билән өткүзүлидиған учришишларда, икки дөләт мунасивәтлири вә районлуқ мәсилиләрни музакирә қилимиз» деди.

түркийә ташқи ишлар министири мәвлүт чавушоғлу йеңидин ташқи ишлар вәзирлики вәзиписигә кәлгән монтеги тошимитсуни тәбриклиди.

у түркийә-йапонийә мунасивәтлирини монтеги тошимитсу билән бирликтә музакирә қилидиғанлиқлирини вә мунасивәтләрни техиму йуқири сәвийәгә чиқиридиғанлиқлирини әскәртти. у монтеги тошимитсуни түркийәгә тәклип қилди.

мәвлүт чавушоғлу твиттерда елан қилған байанатида: «рәһбәрлиримизниң күчлүк ирадилири асасида мунасивәтлиримиз тәрәққий қилмақта. истратегийәлик мунасивәтлиримизни техиму күчәйтип, иқтисадий шериклик келишимини әң қисқа вақит ичидә нәтиҗиләндүрүшни мәқсәт қилимиз» деди.

мәвлүт чавушоғлу түркийәниң нагойа шәһиридики консулханисиниң ечилиш мурасимиғиму иштирак қилди.

у нагойа шәһиридә аичи иштатиниң валийси һидәаки оһмура билән көрүшти вә бу һәқтә твиттерда учур һәмбәһирлиди.

у: «7.5 милйонлуқ нопуси билән йапонийәниң төтинчи орунда туридиған иштати аичиниң мәркизи нагойа шәһири миңларчә пуқрамизға саһибханлиқ қилиду. валий һидәаки оһмураға нагойа консулханисиниң ечилишиға қилған йардәмлири вә консулханимизниң ечилиш мурасимида қилған сәмимий сөзлири үчүн тәшәккүр ейтимиз» деди.

у нагойа шәһиридики учришишлири җәрйанида, палавниң ул-әслиһә вә сода министири чарлес обичаң (Charles Obichang) билән авийатсийә қатнаш келишими имзалиди.