әнқәрә гиретсийә, җәнубий қибрис рим даирилири вә мисирниң қошма байанатиға наразилиқ билдүрди

түркийә авази радийоси хәвири: түркийә җумһурийити ташқи ишлар министирлиқи байанатчиси һами ақсой, 3 дөләтниң ташқи ишлар министирлириниң иштирак қилиши билән америка қошма иштатлириниң нйу йорк шәһиридә өткүзүлгән йиғиндин кейин елан қилинған қошма байанаттики түркийәгә қарши асассиз ибариләрни пүтүнләй рәт қилидиғанлиқлирини билдүрди.

һами ақсой бу һәқтики йазма байанатида, гиретсийә вә җәнубий қибрис рим даирилириниң хәлқара қанунға зит сийасәтлиригә йеқинқи мәзгилләрдә йавропа иттипақи дөләтлири билән биргә район дөләтлириниму қошушқа урунушиниң, шәрқий ақ деңизниң тинчлиқ вә муқимлиқиға пайдилиқ әмәсликини қәйт қилди.

һами ақсой байанатида, «район дөләтлириниң әгә мәсилилири вә қибирс мәсилисидә нә салаһийәтлири, нә мәсулийәтлири, нә дәйдиған сөзлири йоқтур. шәрқий ақ деңизда түркийәни вә қибрис түрклирини нәзәрдин сақит қилиш вә йалғуз қалдуруш йолидики сийасий муддиалар билән ташланған қәдәмләрниң утуққа еришиш мумкинчилики йоқ. униң үстигә, гиретсийәниң бир тәрәптин биз билән һәмкарлиқ орнитиш тәклиплирини йоллап, йәнә бир тәрәптин дөлитимизгә қарши асассиз дәваларни оттуриға қойушиму сәмимийәтсизликиниң намайандисидур» дегәнләрни қәйт қилди.

ақсой, «районда түркийә вә қибрис түрклирини өз ичигә алмиған лайиһәләр һечқачан тәсир йариталмайду. шәрқий ақ деңизда дөлитимиз вә қибрис түрклириниң һәқлирини қоғдашни адаққичә давамлаштуримиз» деди.

гиретсийә, мисир вә җәнубий қибрис рим даирилири ташқи ишлар министирлириниң нйу йорктики йиғинидин кейин елан қилинған байанатта, түркийәниң әгә вә шәрқий ақ деңизда қанунсиз паалийәтләрни елип бериватқанлиқи илгири сүрүлгәниди.