erdoghan foks xewerler qanilining türkiye - amérika munasiwetlirige dair soallirigha jawab berdi

türkiye awazi radiyosi xewiri: jumhur reis rejep tayyip erdoghan, türkiyening rusiyedin s-400 hawa mudapie sistémilirini sétiwélishning türkiye – amérika qoshma ishtatliri munasiwetlirige ziyan yetküzmesliki kéreklikini, chünki bularning türkiye éhtiyajliq boluwatqan nersiler ikenlikini éytti.

erdoghan, türkiye bilen amérika qoshma ishtatlirining shimaliy atlantik ehdi teshkilati – natonimu arqa körünüsh qilidighan istratégiyelik shérikchiliki barliqini bildürüp, «pat – pat dunyadiki özgirishchan sharait peyda qilghan mesililer körülüwatidu, biraq buning héchbir waqit istratégiyelik shérikchilik sewiyesidiki munasiwetlirimizge ziyan yetküzüshige yol qoymiduq, qoymaymiz we izchil türde bu shérikchilikimizning téximu kücheygen halda dawamlishishi terepdari bolup kelduq, hazirmu oxshash pozitsiyedimiz» dédi.

u, türkiye – amérika arisidiki munasiwetlerde soda hejimini 100 milyard dollargha yetküzüshni nishan qilghanliqlirini eskertti.

erdoghan, amérika pirézidénti donald trampning b d t omumiy kéngishidiki sözige qandaq baha béridighanliqi toghrisidiki bir soalgha, trampning sözlirining arisida özi qoshulidighan we qoshulmaydighan nuqtilarning barliqini éytip jawab berdi we süriye mesilisige alaqidar bezi qiyinchiliqlarni hel qilish lazimliqini alahide tekitlidi.

jumhur reis erdoghan, türkiyening rusiye we iran bilen orun jehette yéqin ikenlikini, her ikki dölet bilen tarixiy rishtisi barliqini, buning munasiwetlerni kücheytkenlikini éytti.

erdoghan, türkiye bilen amérika qoshma ishtatliri arisidiki s-400 ni arqa körünüsh qilghan detalashlar toghrisidimu toxtilip, türkiyening f-35 urush ayropilanliri layihesining xéridari emes, shériki ikenlikini eskertti.

u, seudi erebistanning dölet igilikidiki néfit shirkiti – saudi aramkoning néfit chekkilesh orunlirigha qilinghan hujumlar mesiliside iranni eyibleshni toghra dep qarimaydighanliqini éytti we amérikining irangha yürgüzüwatqan émbargoliri toghrisida toxtilip, «küchlüklerning gépi rast bolidighan bir dunya bolmasliqi lazim. hörmet trampning sözlirige qulaq séliwétip, buni chüshendim. <men küchlük, shunga gépim orunluq> déyish toghra emes» dédi.

daésh térrorluq teshkilatigha qarshi türkiyege oxshash küresh qilghan bashqa bir döletning yoqluqini eskertken erdoghan, amérikini térrorluq teshkilatlirigha qarshi küreshte türkiyening sépide turushqa chaqirdi.