erdoghan: türk milliti bügünmu wetini, istiqlali we istiqbali üchün jan pida qilishqa teyyar

türkiye awazi radiyosi xewiri: jumhur reis rejep tayyip erdoghan 30 – awghust zeper bayrimi munasiwiti bilen élan qilghan tebriknamisida, türk millitining shanliq tarixining altun halqiliridin birsi bolghan 30 – awghust zeper bayrimining 97 – xatire yilini tebrikleydighanliqini tekitlep, büyük millet mejlisi ( parlaménti) ning hörmetlik ezaliri we qehriman türk armiyesining barliq eskerliri bilen birlikte milletke bu zeperni hediye qilghan musteqilliq urushining bash qomandani ghazi mustapa kamal atatürkni bu büyük zeperning 97 – xatire yilida minnetdarliq bilen eslep ötti.

erdoghan türkiyediki, shimaliy qibris türk jumhuriyitidiki we dunyaning hemmila yéridiki türk xelqining her bir ezasining 30 – awghust zeper bayrimini tebrikleydighanliqini bildürdi.

erdoghan mundaq dédi:

«30 – awghustta qolgha keltürülgen bu katta zeper bilen teng, millitimiz özige rawa körülgen asaret köynikini yirtip tashlap, meyli qandaq bedel taleshtin qetiy nezer, musteqilliqta hergiz muresse qilmaydighanliqini pütün dunyagha jakalidi. axirqi dölitimiz türkiye jumhuriyitining xush xewerchisi bolghan bu katta zeper eslide tarixtin öchürüp tashlanmaqchi bolghan türk millitining qaytidin janlinishining namidur»

erdoghan bügünki künde süriyening shimalida, iraqta we sherqiy aqdéngizda türkiyege qarshi qurulghan barliq tozaqlarni buzup tashlashta qetiy iradige ige ikenlikini tekitlep, türk millitining we qibris türklirining heq – hoquqining talan – taraj qilinishigha hergiz yol qoymaydighanliqini éytti.