министир чавушоғлу нобел мукапатиға еришкән түрк алими әзиз сәнҗәр билән көрүшти

түркийә авази радийоси хәвири: ташқи ишлар министири мәвлүт чавушоғло, америка зийарити даирисидә нобел мукапатиға еришкән түрк алим әзиз сәнҗәр билән көрүшти.

ташқи ишлар министири мәвлүт чавушоғлу нийуйорк, вашингитон вә мийамидики учришишлиридин кейин шималий каролинаға кәлди.  

шималий каролинада дунйаға мәшһур түрк алими нобел мукапатиға еришкән әзиз сәнҗәр вә рәпиқиси гевн сәнҗәр билән көрүшкән чавушоғлу, сәнҗәр билән илмий тәтқиқатлири вә алий мәктәптики илмий хизмәтлири үстидә сөһбәт өткүзди.

шималий каролина университетида түрк алими сәнҗәр вәзипә өтәйдиған тәҗрибиханини екскурсийә қилған чавушоғлу, алий мәктәп оқуғучилири биләнму сөһбәт қилди.

министир  мәвлүт чавушоғлу арқидин шималий каролина районида оқуватқан түрк вә америкалиқ оқуғучилардин сирт түркийә пуқралири биләнму көрүшти.

чавушоғлу: бу йәргә келишимиздики мәқсәт түрк миллити вә түрк дунйасиниң пәхри болған әзиз сәнҗәрни йоқлаш иди. биз бүгүн бу шәрәпкә наил болдуқ, алимимиз әзиз сәнҗәр йуртини, вәтинини унтуп қалмайдиған, шундақла мәмликитиниң мәниви байлиқлириға һөрмәт қилидиған қиммәтлик вә пәхирлик устазимидур, деди.

илим саһәсидә зор мувәппәқийәтләрни қолға кәлтүргән әзиз сәнҗәрни тәбриклигән министир мәвлүт чавушоғлу, әзиз сәнҗәрниң нурғун түрк вә башқа милләт оқуғучилириға илһам мәнбәси болғанлиқиниму алаһидә әскәртти.