әдлийә министири гүл, анадолу агентлиқиниң қашиқҗи делосиға алақидар соаллириға җаваб бәрди

түркийә авази радийоси хәвири: абдулһамит гүл, анадолу агентлиқиниң, 2 – өктәбирдә сәуди әрәбистанниң истанбулдики консулханисиға кирип кәткәндин кейин хәвәр елиналмиған вашингтон почтиси гезитиниң йазғучиси, әрәбистанлиқ журналист җәмал қашиқҗи (хашиқҗи) вәқәсигә алақидар тәкшүрүш тоғрисидики соаллириға җаваб бәрди.

у, түркийәниң тәкшүрүш хизмәтлирини хәлқара қанунға мас һаләттә әстайидиллиқ шундақла утуқлуқ һалда давамлаштуруватқанлиқини тәкитлигән һалда, «тәкшүрүш истанбул җумһурийәт баш тәптиш мәһкимимиз тәрипидин елип берилмақта. тәкшүрүшниң мәхпий елип бериливатқанлиқиниму әстин чиқармаслиқ керәк. сийасәт саһәси (бу) мусапидә баштин тартипла очуқ – ашкара болуш йолини таллиди. муһим болғини вәқәниң айдиңлитилишидур» деди.

бир консулхана бинасиниң адәттики йәргә охшимайдиғанлиқини, виейнна әһдинамисидә униңға қандақ муамилә қилинидиғанлиқиниң рамкисиниң сизип берилгәнликини тилға алған гүл, «бир мәмурий орган бу йәргә дәрһал киримән, дәп қарар қилалмайду. әһинамидә от, апәт дегәндәк ибариләр бар. қануний тәкшүрүш дәрһал башланди. консулхана бинасини тәкшүрүш үчүн, сәуди дөлитиниң қобул қилиши күтүлди. ташқи ишлар министирлиқи хәт – алақә қилди. кәлгән җаваблардин кейин тәкшүрүш елип берилди. вәқәни тәкшүрүватқан тәрәп әдлийә орунлиримиздур. еришилгән дәлилләргә асасән қәдәмләрни ташлайдиған тәрәпму әдлийә орунлиримиздур. тәкшүрүшләр әстайидиллиқ билән чоңқурлаштурулған һалда давамлаштурулмақта» дегәнләрни қәйт қилди.

сәуди әрәбистан билән җамаәт хәвпсизлик идариси вә башқа органларниң көрүшүшлириниң давамлишиватқанлиқини әскәрткән гүл, бирақ, сәуди әрәбистан даирилириниң бәзи ишларниң кечикип кетишигә сәвәб болғанлиқини сөзлиригә илавә қилди.