чавушоғлу камбоджани фәтһуллаһчилардин һошйар болушқа чақирди

түркийә авази радийоси хәвири: мәвлүт чавушоғлу, меһман министирдин камбоджадики фәтһуллаһчи террорлуқ тәшкилати / параллел дөләт қурулмисиниң паалийәтлиригә хатимә берилишини тәләп қилди.

мәвлүт чавушоғлу билән прак сохон ташқи ишлар министирлиқида қошма мухбирларни күтүвелиш йиғини өткүзди؛ сохон, фәтһуллаһчи террорлуқ тәшкилати / параллел дөләт қурулмисиниң паалийәтлирини йеқиндин көзүтиватқанлиқлирини билдүрди вә дөлитиниң террорлуқниң барлиқ түрлиригә қарши икәнликини тәкитлиди.

у йәнә, түркийәниң 2013 – йили пайтәхт фномпенда әлчихана ечиши билән бирликтә мунасивәтләрниң техиму актип һаләткә кәлгәнликини әскәртип, «камбоджа алдимиздики йили түркийәдә әлчихана ачиду» деди.

камбоджа баш министири хун сенниң мушу айниң ахирида түркийәдә дөләт ишлири зийаритидә болидиғанлиқи тоғрисидики учурниму ортақлашқан прак сохон, зийарәтниң икки шерикчиликиниң гүллинишигә төһпә қошидиғанлиқини тәкитлиди. у, иқтисадий саһәдә болса, иккинчи қетимлиқ қошма иқтисадий комитет йиғининиң әң қисқа вақит ичидә чақирилиши тоғрисида мәвлүт чавушоғлу билән пикир алмаштурғанлиқини қәйт қилди.

министир чавушоғлуму йиғинда сөз қилип, икки дөләт арисидики мунасивәтләрни гүлләндүрүш үчүн, буниңдин кейин кеңәш йиғинлирини техиму мунтизм һаләткә кәлтүрүш лазимлиқини, қошма иқтисадий комитет йиғининиң үчинчи қетимлиқиниң алдимиздики мәзгилдә чақирилидиғанлиқини билдүрди.

чавушоғлу йәнә, камбоджадики сайламда ғәлибә қилғанлиқи мунасивити билән мәнсәпдешини тәбриклиди.

асийаниң дунйа сийасити вә иқтисадиниң йеңи еғирлиқ нуқтисиға айлинишқа башлиғанлиқини тилға алған чавушоғлу, түркийәниңму бу даиридә асийа дөләтлири вә райондики тәшкилатлар билән мунасивәтлирини күчәйткәнликини тилға елип өтти. у сөзини давамлаштуруп, иқтисадий һәмкарлиқниңму күчәйтилгәнликини, камбоджа билән болған сода һәҗиминиң мәвҗут имканийәтләрни әкс әттүрүп бәрмәйдиғанлиқини әскәртти.

қисқа вақит ичидә икки арисида авийатсийә қатнишиниң башлинишини үмид қилидиғанлиқини билдүргән чавушоғлу, өзара сайаһәтчи саниниң ашурулуши йолида қилиниватқан хизмәтләрни давамлаштуридиғанлиқлирини тәкитлиди.

мунасивәтләрниң қануний асасиниму күчәйтиш лазимлиқиға ишарәт қилған чавушоғлу, камбоджа баш министириниң түркийәдә елип баридиған зийарити җәрйанида, қош баҗ қойушниң алдини елиш келишимигә охшаш бир қатар келишимләрни имзалашни пиланлаватқанлиқлирини ейтти.

у, 2020 – йили икки арисида дипломатик мунасивәт орнитилғанлиқиниң 50 йиллиқиниң тәбриклинидиғанлиқини, бу даиридә һәр икки дөләттә һәр хил паалийәтләрниң өткүзүлидиғанлиқини билдүрди.

түркийәниң шәрқий җәнубий асийа дөләтлири иттипақидин өткән йили саһәләр бойичә дийалог шерики салаһийити алғанлиқини әскәрткән чавушоғлу, көплигән намзат арисидин пәқәт түркийә тәқдим қилған һәрикәт пилани вә йол хәритиси сайисида аваз бирлики билән буниң қобул қилинғанлиқини тәкитләп өтти.

чавушоғлу, өткән йили манилада бу салаһийәткә еришиш мусаписидә түркийәни қоллап – қуввәтлигән мәнсәпдешиға рәһмәт ейтип, «буниңдин кейинки мусапидә йәнә шәрқий җәнубий асийа дөләтлири иттипақи райни вә пүткүл асийа билән мунасивәтлиримизни техиму гүлләндүримиз вә камбоджа бизгә нисбәтән муһим бир шерик» дегәнләрни сөзлиригә илавә қилди.

икки дөләт дипломатийә академийәлири арисида бир келишим имзаланғанлиқини билдүргән чавушоғлу, икки министирлиқ арисидики өзара мунасивәтләр, дипломатик өзгиришләр шундақла йаш дипломатларни тәрбийәләш дегәндәк мәсилиләргә алақидар саһәләрдики алақиләрниму күчәйтидиғанлиқлирини тәкитлигән һалда сөзлирини ахирлаштурди.